[A:191]པར་བསྒྱུར། སྐྱེས་བུ་དམ་པ་འདི་ནི་ཤིང་ཕོ་སྤྲེའུ་ལ་འཁྲུངས་ནས། བརྒྱད་ཅུ་རྩ་གཉིས་པ་ཤིང་མོ་སྦྲུལ་ལ་ཞི་བར་གཤེགས།
འཇམ་དབྱངས་བསམ་གྲུབ་རྡོ་རྗེ་ནི། སྙིང་མའི་སྐུ་ཡོན་ཏན་ཅན་རིམ་པར་བྱོན་པའི་སྲས་སུ་རྟ་ནག་གནས་གསར་དུ་ཤིང་མོ་ལུག་གི་ལོ་ལ་འཁྲུངས། ཟུར་བྱམས་པ་སེང་གེ་ལ་གསན་པ་རྒྱ་ཆེན་པོ་མཛད། ཁྱད་པར་དུ་སྒྱུ་འཕྲུལ་སྐོར་ལ་མཁས། སྒྱུ་འཕྲུལ་གྱི་དབང་རྣམས་གླན་ཉ་ཚལ་བ་བསོད་ནམས་མགོན་པོ་ལ་གསན། ཡང་དབེན་པའི་ཟུར་ཤཱཀྱ་འབྱུང་གནས་ཞེས་པ་ཤིན་ཏུ་མཁས་གྲུབ་ཏུ་གྲགས་པ་དེ་དང༌། འུག་པ་ལུང་པའི་བླ་མ་སེང་གེ་བ་གཉིས་ཆུང་ཆུང་ནས་ཞབས་དྲུང་དུ་བཞག་ནས་ལེགས་པར་བསྐྱངས་པས། ཕྱིས་ཟུར་པའི་བརྒྱུད་པ་ལ་ཤིན་ཏུ་བཀའ་དྲིན་ཆེ། བྱེ་མ་སེང་གེར་རྫོགས་པ་ཆེན་པོ་སྙིང་ཐིག་ལ་ཐུགས་དམ་རྩེ་གཅིག་ཏུ་མཛད་པས། ཐིག་ལེ་ཆེན་པོའི་སྐུར་གྱུར་ནས་སངས་རྒྱས་ཀྱི་ཞིང་མང་པོར་བྱོན་པ་ལ་སོགས་པ་ཐུགས་དམ་ཤིན་ཏུ་མཐོ་བར་མངའ་སྟེ། དགུང་ལོ་བརྒྱད་ཅུ་རྩ་གཉིས་པ་མེ་ཕོ་འབྲུག་ལ་གཤེགས་ཏེ། གཤེགས་ཁར་རང་གི་སྲས་ལ། ང་བདེ་བ་ཅན་དུ་འགྲོ། ཉིད་ཀྱིས་ཀྱང་བརྒྱད་ཅུ་རྩ་གཉིས་ཐུབ་པར་འདུག་སྟེ། དེ་ནས་བདེ་བ་ཅན་དུ་ཤོག་གསུང་བའི་བཀའ་སྩལ་གནང༌། ཤངས་པ་ཀུན་མཁྱེན་པ་ཞེས་གྲགས་པ་དང་སྙན་པས་ཕྱོགས་ཀུན་ཏུ་ཁྱབ་པ་དེའང༌། བྱིས་པའི་དུས་ན་བླ་མ་འདིས་དབང་མང་དུ་བསྐུར། ལེགས་པར་བྱིན་གྱིས་བརླབས་པས་མཁས་པ་ཆེན་པོར་གྱུར་པ་ཡིན་ནོ།
xvii.