[A:206]གྲགས་སོ། །ལོ་ཙཱ་བ་ཆེན་པོ་དེ་ལ་དུས་དེའི་ཚེ་བོད་རུ་བཞིའི་མཁས་པ་མང་པོས་བཏུད་པར་གྱུར་ཏེ། གོ་རུབ་ལོ་ཙཱ་བ་དགེ་སློང་ཆོས་ཀྱི་ཤེས་རབ་ཅེས་བྱ་བ། ཆོས་ཕྱོགས་མེད་ལ་མཁས་པར་གྲགས་པ་ཞིག་གིས། ཐོག་མར་བོད་དུ་སྐྱེས་པའི་གང་ཟག་གིས་ཆོས་མང་པོ་རྩོམ་པ་ཞེས་དཔྱས་སོ། ཕྱིས་བླ་མ་རོང་ཟོམ་གྱིས་མཛད་པའི་ཐེག་པ་ཆེན་པོའི་ཚུལ་ལ་འཇུག་པའི་པུ་སྟི་དེ་མཐོང་ནས། གུས་པ་ཆེན་པོ་སྐྱེས་ཏེ། ཟང་ཟིང་མང་པོས་བསྙེན་བཀུར་བྱས་ཏེ་ཉེས་པ་བཤགས་ནས། བདག་རྗེས་སུ་གཟུང་དུ་གསོལ་ཞེས་བཀའ་ཞུས་པས་གནང་སྟེ། འཇམ་དཔལ་གསང་བའི་རྒྱུད་ལ་སོགས་པའི་ཆོས་མང་དུ་གསན། གཞན་ཡང་མར་པ་ཆོས་ཀྱི་དབང་ཕྱུག་ལ་སོགས་པའི་ལོ་ཙཱ་བ་དང༌། མཁས་པར་གྲགས་པའི་བློ་རྩལ་ཅན་མང་པོས་བཏུད་ཅིང་གསན་པར་གྱུར་ཏེ། གསན་པ་དེ་དག་གི་སློབ་བརྒྱུད་ཐམས་ཅད་ཀྱང་ཤིན་ཏུ་དད་པར་གྱུར་ནས་བླ་མ་དམ་པར་འཛིན་ནོ། །གསང་རྒྱུད་ཀྱི་སྐབས་ན་མར་དགེ་བཤེས་ཆེན་པོའི་ཞལ་ནས། འོ་སྐོལ་ལ་ད་ལྟ་རྒྱ་དཔེ་ཡོད་པར་གྱུར་ན་འདི་ལྟར་འགྲོ་བ་ཡིན་ཏེ། རྒྱ་དཔེ་མེད་པས་ད་ལྟ་བཅོས་སུ་མེད་གསུང་བ་ལ། གོ་རུབ་ཀྱིས་དེ་གཟུང་ནས་ཕྱིས་ཇོ་བོ་ཀྲྀཥྞ་བ་ཞེས་བྱ་བའི་པནྚི་ཏ་ལ་རྒྱ་དཔེ་བྱུང་ནས་དེ་ལ་གསན་པས། རོང་པ་ཆེན་པོ་གསུང་བ་བཞིན་བྱུང་ནས་ཤིན་ཏུ་མོས་ཏེ། ཀྲྀ་ཥྞ་པ་ལས་བྱུང་བའི་དཔེ་ཞིག་རོང་པ་ཉིད་ལ་ཕུལ་ནས་ཡང་གསན་སྐད། གཞན་ཡང་རྒྱ་གར་གྱི་མཁན་པོ་མཉྫུ་ཤྲཱི་ཝརྨ་དང༌། མཉྫུ་ཤྲཱི་ཛྙ་ན་དང༌། ཨུ་པཱ་ཡ་ཤྲཱི་མི་ཏྲ་དང༌། བུདྡྷ་ཨཱ་ཀ་ར་བྷ་དྲ་དང༌། དེ་བཱ་ཀ་ར་ཙནྡྲ་དང༌། པ་ར་མེ་ཤྭ་ར་དང༌། ཨ་མོ་གྷ་