[A:205]ཀྱིས་བསྒྱུར་བ་རྣམས་ཚེ་འདི་དང་ཕྱི་མ་གཉིས་ཀ་བདེ་བ་ལ་འགོད་པའི་ཕྱིར། འབྱོར་ཞིང་འགྲིག་པའི་བསྟན་བཅོས་ཉིད་ཀྱི་ཞལ་སྔ་ནས་ཕྱུང་སྟེ། དེ་དག་ལ་ཕན་འདོགས་པ་ལ་དུས་རྟག་ཏུ་སྐྱོ་བ་མི་མངའ། ཆོས་ཀྱིས་བློ་མ་བསྒྱུར་བའི་སྐྱེ་བོ་ཕལ་བ་ལ་ཡང་སེར་སྣ་དང་གནོད་སེམས་སྤངས་ནས་ཐུགས་རྗེའི་ཡུལ་དུ་མཛད་དེ་ཞི་བདེ་ལ་འགོད་པ། སྡོམ་པ་དང་ཐུགས་དམ་ལ་ནོར་བུ་རིན་པོ་ཆེ་དང་སྲོག་གི་དབང་པོ་ལྟར་གཅེས་པར་མཛད་ཅིང༌། གཞན་ཡང་དེ་ལ་འགོད་པ། དམ་པའི་ཆོས་རྩོམ་པ་ན་གླེགས་བམ་བསྡུས་ཞིང་གཟིགས་པ་ལ་སོགས་པའི་རྩོལ་བ་མ་མཛད་ཀྱང༌། ཆོས་ཕྱོགས་མེད་ལ་ཐོགས་རྡུག་མེད་པར་སྤྲོ་བར་ནུས་པ། དེས་མཛད་པའི་ཆོས་ཐམས་ཅད་ཀྱང་ལུང་དང་རིགས་པ་དང་བླ་མའི་ཉེ་བར་བསྟན་པ་དང་མི་འགལ་ཞིང༌། སྒྲ་སྐྱོན་དང་དོན་སྐྱོན་དང་རྣམ་པར་བྲལ་བས་གཞན་མཁས་པར་གྲགས་པ་གང་གིས་ཀྱང་རྩོད་མི་ནུས་པར་གྲགས་པའོ། དེ་ཉིད་ནི་ཐོག་མ་ཉིད་ནས་ཧ་ཅང་མ་འབད་པར་སཾ་སྐྲྀ་ཏའི་སྐད་ལ་སོགས་པ་རྒྱ་གར་གྱི་སྒྲའི་བྱེ་བྲག་མང་པོ་དང༌། སྒྲའི་བསྟན་བཅོས་ཀྱི་དོན་ལ་མ་རྨོངས་པར་གྲགས། སྐུ་བྱིས་ཆུང་གི་དུས་སུ་ཨ་ཙ་ར་འདུག་ཚད་ལ་དགྱེས་ཤིང་དེ་དག་གི་སྐད་ལ་དགྱེས། དེ་ནས་བི་བརྟའི་པུ་ཏི་ལ་བརྟགས་པས་མཁྱེན་པ་ལ་ཚེགས་མ་བྱུང༌། ཐ་ན་དུད་འགྲོའི་བརྡ་དང་སྐད་ཀྱང་མཁྱེན་པར་གྲགས། དེའི་ཕྱིར་དེས་མཛད་པའི་གསར་སྔགས་ཀྱི་ཡི་གེ་རྣམས་ལ་སློབ་པའི་བརྒྱུད་དུ་བྱུང་བའི་གང་ཟག་རྣམས་ཀྱི། ལུང་མ་ཐོབ་པར་ཡི་གེ་ལས་བྱུང་བ་བཞིན་དུ་སྦྱར་བ་ལས་བྱིན་རླབས་མ་བྱུང་ག་མེད་ཅེས་