[A:209]མཛད། ལྷག་པ་ཏིང་ངེ་འཛིན་གྱི་བསླབ་པ་རྒྱུད་ལ་བསྐྱེད་པའི་ཕྱིར་འགྲེལ་པ་ཚུལ་བཞི་ཡན་ལག་བཅོ་ལྔ་པ་མཛད། མཉམ་སྦྱོར་ལའང་འགྲེལ་པ་མཛད། ལྷག་པ་ཤེས་རབ་ཀྱི་བསླབ་པ་རྒྱུད་ལ་བསྐྱེད་པའི་ཕྱིར་རྫོགས་པ་ཆེན་པོའི་ལྟ་སྒོམ་མན་ངག་མཛད། ངན་སོང་སྦྱོང་རྒྱུད་དང༌། འཇིགས་བྱེད་དང༌། སྨྲ་སྒོ་ལ་སོགས་པའི་འགྲེལ་པ་དང་བསྟན་བཅོས་མང་དུ་མཛད། དེའི་དུས་སུ་ཤབ་ཀྱི་ཡང་ཁྱེད་བླ་མ། མར་པ་དོ་བ། འུ་ཡུག་པ་མདའ་བསམ་གཏན། མདོའི་ཁྱུང་པོ་ཧཱུཾ་སྙིང༌། སེ་ཁྲོམ་རྒྱ་མཚོ་འབར། མཚམས་སྟོན་གོ་ཆ། བང་ཀ་དར་ཆུང༌། འགོས་ལྷས་བཙས། རྒྱ་རྒྱལ་ཚུལ་ལ་སོགས་པ་བོད་རུ་བཞིའི་མཁས་པ་ཐམས་ཅད་རྩོད་དེ། བོད་དུ་སྐྱེས་པའི་གང་ཟག་གིས་བསྟན་བཅོས་འདི་ཙམ་རྩོམ་པ་མི་རིགས་སོ་ཞེས་ཟེར་ཞིང་སུན་འབྱིན་དུ་འོངས་བ་ལ། བསྟན་བཅོས་རེ་མཐོང་ཞིང་གསུང་གླེངས་རེ་མཛད་པས་ཐམས་ཅད་ངོ་མཚར་སྐྱེས་ནས་ཞབས་ཏོག་རེ་མཛད། ཆོས་རེ་ཡང་གསན། ཀུན་གྱིས་བླ་མར་འཁུར་ཞིང་སྤྱི་བོས་འདུས་པར་གྱུར་ཏོ། །ཞེས་པ་ཡང་རོང་ཟོམ་གྱི་ཐུགས་སྲས་གཡག་རྡོ་རྗེ་འཛིན་པ་ལས་བྱུང་བའོ།
།སྐྱེས་བུ་དམ་པ་འདིའི་གདུང་རབས་ནི། རོང་བན་དཔལ་གྱི་རིན་པོ་ཆེ། དེའི་སྲས་རོང་བན་རིན་ཆེན་ཚུལ་ཁྲིམས། དེའི་སྲས་རོང་ཟོམ་ཆོས་ཀྱི་བཟང་པོ་དང་སྒོམ་ཆེན་ཆོས་འཕགས་གཉིས་སོ། ཆོས་བཟང་གི་སྲས་གཟི་བརྗིད་འབར་དང་། འབུམ་པ་གཉིས། གཟི་བརྗིད་འབར་གྱི་སྲས་སྟོན་དར་དང་སྟོན་སྐྱབས་གཉིས་སོ། སྟོན་དར་གྱི་སྲས་སྟོན་སེང༌། དེའི་སྲས་ཇོ་སྲས་ར་པེ། དེའི་སྲས་