[A:210]འབུམ་དཔལ། སྟོན་སྐྱབས་ཀྱི་སྲས་ཇོ་སྲས་འོད་ཟེར། དེའི་སྲས་སློབ་དཔོན་འབུམ་བསྟན། རོང་པ་འབུམ་འབར་གྱི་སྲས་ཆོས་ཀྱི་རྒྱལ་མཚན་དང༌། ཇོ་རྩེགས་དང༌། ཇོ་བཟང་ལ་སོགས་པའོ། ཆོས་ཀྱི་རྒྱལ་མཚན་གྱི་སྲས་རུ་ཨཱ་ནནྡ་བཛྲ་སྟེ་རོང་པ་ཀུན་དགའ། དེའི་སྲས་དར་བཟང་དང་རྡོརྗེ་བསྟན། དར་བཟང་གི་སྲས་སློབ་དཔོན་མེ་དཔུང་ངོ༌། དེའི་སྲས་ཆོས་ཀྱི་བཤེས་གཉེན་དང༌། ཆོས་བཞད་དོ། རོང་པ་ཇོ་བཟད་ཀྱི་སྲས་ཀྱི་སྲས་སློབ་དཔོན་ཇོ་བཀྲ། དེའི་སྲས་སློབ་དཔོན་གསེར་འོད། ཇོ་བརྟན་གྱི་སྲས་ཉི་སེང༌། དེའི་སྲས་འོད་ཟེར་འབུམ་དང་འབུམ་རྒོད། རོང་སྒོམ་ཆོས་འཕགས་ཀྱི་སྲས་སློབ་དཔོན་སྟོན་གཡུང༌། དེའི་སྲས་ཇོ་སྲས་ལྷས་སྤུངས། དེའི་སྲས་སློབ་དཔོན་བྱམས་ཆོས་པ་ཆེན་པོ་དར་མ་བརྟན། དེའི་སྲས་སློབ་དཔོན་སྲ་བརྟན་རྡོ་རྗེ་ཡིན་ནོ། དེ་ལྟར་རོང་ཟོམ་འདི་ནི་འཁྲུངས་པ་ཙམ་ཉིད་ནས་ལྷུན་གྱིས་གྲུབ་པའི་ཤེས་རབ་ཆེན་པོ་དང༌། ངང་གིས་དགེ་བའི་སྤྱོད་པ་ཅན་འདི་ནི། རང་དང་དུས་མཚུངས་པའི་མཁས་པ་ཐམས་ཅད་ཀྱིས་མངོན་པར་བསྟོད་པ། ཕྱི་དང་ནང་གི་རིག་པའི་གནས་དང༌། སཾ་སྐྲྀ་ཏ་དང་སྐད་རིགས་ཀྱི་བྱེ་བྲག་གཞན་མང་པོ་ལ་མ་རྨོངས་པ། བོད་ཀྱི་སྐད་ཉིད་ལ་ཡང་འདི་ནི་དོན་འདི་ཙམ་ཞིག་ལ་འཇུག་གོ །ཞེས་བྱ་བའི་ཁྱད་པར་ཕྲ་མོ་དག་ཀྱང་གཞན་ལས་ཆེས་ལྷག་པ། མདོ་སྡེ་དང་རྒྱུད་སྡེ་དང་བསྟན་བཅོས་ཀྱི་བྱེ་བྲག་མ་ལུས་པ་ཐུགས་སུ་ཆུད་པ། ཐ་ན་འཇིག་རྟེན་པའི་འཚོ་ཚིས་ཞིང་ལས་དང༌། ཕྱུགས་སྐྱོང་བ་དང༌། དཀར་ཤེ་ཇི་ལྟར་སྒྲུབ་པའི་ཚུལ་གྱི་བསྟན་བཅོས་ཀྱང་མཛད་ལ། བོད་ཀྱི་ལྷ་འདྲེ་ཕལ་ཆེ་བའི་གནས་དང་སྤྱོད་