[A:211]པ་ཡང་ཐུགས་སུ་ཆུད་ཅིང། ལྟ་བ་མཆོག་ཏུ་གྱུར་པཀུན་ལས་ཁྱད་པར་དུ་གྱུར་པས། བོད་གངས་ཅན་གྱི་རྒྱུད་འདིར་འདི་དང་མཉམ་པའི་མཁས་པ་ནི་སུ་ཡང་མ་བྱུང་ངོ༌། འདི་ལ་སྔོན་གྱི་མན་ངག་བརྒྱུད་པ་མང་དུ་མངའ་བ་དག་ཀྱང་བླ་མའི་བརྒྱུད་པའི་རིམ་པར་འདུས་པར་སྣང་སྟེ། འདི་ལྟར་སློབ་དཔོན་པདྨའི་གདམས་པ་རྣམས་སྣ་ནམ་རྡོ་རྗེ་བདུད་འཇོམས། མཁར་ཆེན་དཔལ་གྱི་དབང་ཕྱུག དོམ་ཨ་ཙ་ར་དཔལ་མེ་ཏོག་སྒྲོ་རྡོ་རྗེ་གཞོན་ནུ། ཞང་ཞུང་ཡོན་ཏན་གྲགས། རོང་བན་ཡོན་ཏན་རིན་ཆེན། རོང་བན་རིན་ཆེན་ཚུལ་ཁྲིམས་ཀྱི་བར་དུ་བརྒྱུད་དེ་གསན་ནོ། །ཡང་བཻ་རོ་ཙ་ནས་གཡུ་སྒྲ་སྙིང་པོ། དེས་བླ་ཆེན་པོ་དགོངས་པ་གསལ། དེས་གྲུམ་ཤིང་གླག་ཅན། དེས་སྣུབས་དཔའ་བརྟན། དེས་ཡ་ཟི་བོན་སྟོན། དེས་རོང་ཟོམ་ལ་བཤད་དེ་སེམས་སྡེའི་བརྒྱུད་པ་གཅིག་གོ ཡང་ལྡན་གློང་ཐང་སྒྲོན་མར་ཨ་རོ་ཡེ་ཤེས་འབྱུང་གནས་ཞེས་བྱ་བ་གྲུབ་པའི་སྐྱེས་བུ་ཞིག་བྱུང་སྟེ། དེ་ལ་རྒྱ་གར་བདུན་བརྒྱུད་དང༌། རྒྱའི་ཧྭ་ཤང་བདུན་བརྒྱུད་ཀྱི་གདམས་པ་མངའ་ཞིང༌། དེས་ཅོག་རོ་ཟངས་དཀར་མཛོད་ཁུར་དང༌། ཡ་ཟི་བོན་སྟོན་ལ་གསུངས་ཏེ། དེ་གཉིས་ཀྱིས་རོང་ཟོམ་ལ་བཤད། འདི་ལ་རྫོགས་ཆེན་ཁམས་ལུགས་ཞེས་ཟེར། ཡང་བི་མ་ལས་མྱང་ཏིང་འཛིན་བཟང་པོ་ལ་གསུངས་པ་དང༌། བི་མ་ལས་རྨ་རིན་ཆེན་མཆོག་དང༌། གཉགས་ཛྙཱ་ན་ཀུ་མཱ་ར་ལ་གསུངས་པའི་མན་ངག་ཀྱང༌། དེ་གཉིས་ཁུ་བྱང་ཆུབ་འོད་དང༌། ཁྱུང་པོ་དབྱིག་འོད་ལ་བརྒྱུད་ནས་རིམ་གྱིས་རོང་ཟོམ་ཆོས་བཟང་ལ་མན་ངག་རྣམས་