[A:213]གྱིས་དག་པ་བརྗོད་པ་ན། གསང་སྔགས་གསར་མའི་རྒྱུད་འགྲེལ་པ་སྒྲུབ་ཐབས་མན་ངག་འདི་ཙམ་ཞིག་འགྱུར་བ་ལ། ཐ་ན་རྫོགས་པ་ཆེན་པོ་ཞེས་པའི་མིང་ཙམ་ཡང་མེད་ཅེས་སྨྲ་བ་ནི། རང་ཉིད་མཐོང་བ་ཆུང་བར་སྟོན་པ་སྟེ། འཇམ་དཔལ་ཞལ་ལུང་ལས། །རྫོགས་པ་ཆེན་པོ་ཡེ་ཤེས་སྤྱི་གཟུགས་ཅན། ཞེས་གསུངས་ཤིང༌། སྨན་ཞབས་ཀྱིས་ཇི་ལྟ་བའི་དོན་སྒོམ་པ་ཡིན་པར་ཡང་བཤད་དོ། །ཡེ་ཤེས་ཞབས་ཀྱིས་མཛད་པའི་སྒྲུབ་ཐབས་ཀུན་ཏུ་བཟང་མོར་ཡང་རྫོགས་པ་ཆེན་པོ་ཞེས་བཤད་ཅིང༌། སྨན་ཞབས་ཀྱིས་མཛད་པའི་དངོས་གྲུབ་འབྱུང་གཏེར་དུ་ཡང་རྫོགས་པ་ཆེན་པོའི་མཚན་གསལ་བར་བཤད་པའི་ཕྱིར་རོ། །གཞན་ཡང་ཞལ་ལུང་གི་འགྲེལ་པར། གསང་བའི་སྙིང་པོ་ལས་གསུངས་པའི་ནུས་པའི་དབང་ལྔ་པོ་དེ་སྨོས་ནས། དེ་ཆ་མཐུན་པའི་རྣལ་འབྱོར་ཆེན་པོའི་རྒྱུད་ལས་གསུངས་པར་ཡང་བཤད་དོ། །གཞན་ཡང་ཞལ་གྱི་ལུང་དུ། འཇིག་རྟེན་གསུམ་གྱི་སྒྲོན་མ་ཀུན་གྱིས་རབ་བསྔགས་པ། །ཆོས་རྣམས་ཀུན་གྱི་སྙིང་པོ་དངོས་གྲུབ་དེ་བཞིན་ཉིད། །སྲིད་པའི་དུག་ཆུ་བཟློག་བྱེད་གསུམ་ཁོང་བམ་སྟེང་འབར། །འཇམ་དབྱངས་བླ་མའི་ལུང་གིས་རྟོགས་ཕྱིར་བཤད་པར་བྱ། །ཞེས་གསུངས་པ་དང༌། སེམས་སྡེ་བཅོ་བརྒྱད་ཀྱི་དང་པོ་རྡོལ་གསེར་ཞུན་དུ། སྟོན་པ་འཇིག་རྟེན་སྒྲོན་མར་གྱུར་པ་ཀུན་གྱིས་མཚུངས་པར་རབ་བསྔགས་པ། །ཆོས་ལ་ཆོས་ཀྱི་སྙིང་པོར་གྱུར་པ་འཇམ་དཔལ་གཞོན་ནུའི་སྙིང་པོ་ཉིད། །བདེ་གཤེགས་མ་ལུས་ཡུམ་དུ་གྱུར་པས་རྒྱལ་བ་ཀུན་གྱི་ལམ་གཅིག་པུ། །ཚུལ་ཁྲིམས་ལ་སོགས་ཕ་རོལ་ཕྱིན་ལམ་སྤྱོད་པ་