[A:214]རྒྱ་མཚོའི་ཞིང་གྱུར་པ། ཞེས་གསུངས་པ་དག་ཚིག་གི་འཇུག་པ་ཤིན་ཏུ་མཐུན་པར་ཡང་སྣང་བའི་ཕྱིར་རོ། །འདིར། ཚུལ་ཁྲིམས་ལ་སོགས་ཕ་རོལ་ཕྱིན་ལམ་སྤྱོད་པ་རྒྱ་མཚོའི་གཞིར་གྱུར་པ། ཞེས་གསུངས་པ་འདི་ནི་རྫོགས་པ་ཆེན་པོ་ཐབས་ཀྱི་སྤྱོད་པ་རྣམས་འགེགས་ཤིང་མི་འདོད་པར་སྨྲ་བ་ཡང་བསལ་བ་ཡིན་ནོ། །དེ་ཡང་ཞལ་གྱི་ལུང་ལས། །ཆོས་རྣམས་གཟུགས་ལ་སོགས་པ་རྣམས། །ཀུན་མཁྱེན་བར་གྱི་རང་བཞིན་ནི། །ནམ་མཁའི་དཀྱིལ་ལྟར་རྣམ་དག་པའི། །ཟབ་གསལ་གཉིས་མེད་ཡེ་ཤེས་ཏེ། ཞེས་གསུངས་ཤིང༌། དེའི་དོན་འཆད་པ་ན། །རྣམ་པར་རྟོག་པ་ཀུན་བྲལ་བས། །བསམ་བརྗོད་ཡུལ་ལས་ཤིན་ཏུ་འདས། །མཁའ་བཞིན་དྲི་མེད་ཀུན་འབྱུང་བ། །བརྟགས་བྲལ་ཟབ་མོ་ཉིད་ཅེས་བྱ། །ཕྱག་རྒྱ་ཆེན་པོའི་གཟུགས་འཆང་བ། །སྒྱུ་མ་གཞའ་ཚོན་ལྟ་བུ་རུ། །རང་དང་གཞན་གྱི་རྒྱུད་སྦྱོང་བས། །ཡང་དག་གསལ་བ་ཞེས་བྱའོ། །ཞེས་གྲོལ་བའི་ཐིག་ལེ་ལས་གསུངས་ཏེ། དེ་ལྟ་བས་ན་སེམས་ཕྱོགས་པ་རྣམས་ལ་གསལ་བ་གཏན་མེད་པ་མ་ཡིན་མོད་ཀྱི། །ཟབ་མོའི་ཕྱོགས་ཤས་ཆེ་བར་སྣང་ལ། མན་ངག་པ་རྣམས་ལ་ཟབ་མོའི་ཕྱོགས་ཡོད་ཀྱང་གསལ་བ་ཤས་ཆེ་བར་སྣང་ངོ༌། །ཀློང་གི་སྐོར་རྣམས་ལས་ནི་ཟབ་པ་དང་གསལ་བ་གཉིས་ཆ་མཉམ་པར་འཆད་དོ།
།དེ་ལ་སློབ་དཔོན་རྙིང་མ་བ་རྣམས། སློབ་དཔོན་སངས་རྒྱས་གསང་བ་དང་དེའི་སློབ་མ་བི་མ་ལ་ཡིན་པར་བཤད་ནས། ཆོས་ཕལ་ཆེར་དེ་གཉིས་ལས་བརྒྱུད་པར་འཆད་དེ།
སློབ་དཔོན་སངས་རྒྱས་གསང་བ་ནི། སློབ་དཔོན་ཡེ་ཤེས་ཞབས་ཀྱི་དངོས་ཀྱི་