[A:243]ཆེར་མི་གསུང༌། ལྷ་སར་ཇོ་བོ་ལ་མཆོད་པ་ཕུལ་དུས། འོད་ཀྱི་ཐིག་ལེའི་ནང་དུ་ཕྱག་རྡོར་དང་སྤྱན་རས་གཟིགས་གཟིགས། ཐོ་རངས་ཁ་ཅིག་འོད་ཀྱི་ཐིག་ལེའི་ནང་དུ་ཚེ་དཔག་མེད་གཟིགས། ངེད་རང་ལ་ཚེ་རིང་བརྒྱུད་མེད་ཀྱང་ཁོ་བོ་ལེགས་པར་བྱུང་བ་དེས་ཡིན་པ་འདྲ་གསུང་ཞིང༌། ཡོས་ཀྱི་ལོ་ལ་ངོ་མཚར་བའི་ལྟས་དང་བཅས་ཏེ་གཤེགས།
དེ་ལ་འཁྲུལ་ཞིག་སེང་གེ་རྒྱལ་པས་ཐུག་པ་ཡིན་ཏེ། གཡུ་རུ་གྲའི་ཕུ་སོ་གད་འཕྲེང་གི་གྲོང་དུ། ཡབ་བཀྲ་ཤིས་དངོས་གྲུབ་དང་ཡུམ་དཔལ་ལེ་གཉིས་ཀྱི་སྲས་སུ་འཁྲུངས། བལྟམས་པའི་ཚེ་ཁང་པའི་རྩེ་ལ་ནི་ཉི་མ་རྩེ་ཤར་ལ་འཇའི་གུར་ཕུབ། ལོ་དགུ་ནས་དག་སྣང་དང་མོས་གུས་དཔག་ཏུ་མེད་པ་སྐྱེས། བཅུ་ལ་སྣང་བ་སྒྱུ་མར་ཤར། བཅུ་གཉིས་པ་ལ་སྐྱོ་ཤས་དྲག་པོ་སྐྱེས། བཅུ་གསུམ་པ་ལ་ཉི་ཟླ་དུས་གཅིག་ཏུ་ཤར་བ་རྨིས་པ་སད་འཕྲལ་དུ། ཐུགས་རྗེ་ཆེན་པོས་སྙིང་ཐིག་གི་དོན་སྒོམས་ཤིག་གསུང་ནས་མི་སྣང་བར་གྱུར། དེ་ནས་སྙིང་རྗེ་ཕྱོགས་མེད་དུ་རྒྱས་བཅོ་བརྒྱད་པ་ལ་སྣང་སེམས་སྒྱུ་མར་རྟོགས། ཉི་ཤུ་པ་ལ་མཁན་པོ་ལྡེའུ་སྒང་པ་དང་སློབ་དཔོན་བཀྲ་ཤིས་སྣང་བ་གཉིས་ལ་རབ་ཏུ་བྱུང༌། ཉི་ཤུ་རྩ་ལྔ་པ་ལ་སྲི་ཞལ་དུ་སེང་གེ་རྒྱབ་ཏུ་བྱོན་ནས། སེང་གེ་རྒྱབ་པ་བར་པ་ལ་འཚལ་པའི་ཆོས་སྐོར་རྣམས་གསན། བླ་མ་རྩ་རི་བ་དང༌། རླུང་སེང་གེ་འཇིང་བསྣོལ་སྐོར་རྣམས་ཞུས། རས་པ་དྲི་མེད་འོད། ལྷ་རི་དཔལ། གཞོན་ནུ་འབུམ། སྟོན་ཆར། བྱང་ཆུབ་ཡོན་ཏན། སློབ་དཔོན་ཇོ་སྲས་ལ་སོགས་པ་རྣམས་ལ་ཞི་བྱེད་དང༌། ཕྱག་ཆེན་དང་།