[A:244]གསང་སྔགས་གསར་རྙིང་གི་གདམས་པ་མང་དུ་ཞུས། ཁྱད་པར་ཇོ་འབེར་ལ་སྙིང་ཐིག་གི་གདམས་པ་མ་ལུས་པར་ཞུས་ནས། རི་ཁྲོད་ལུང་སྟོང་རྣམས་སུ་ལོ་དུ་མར་སྒྲུབ་པ་ལ་ནན་ཏན་མཛད། སྐལ་ལྡན་མང་པོ་སྨིན་གྲོལ་གྱི་ལམ་ལ་བཀོད་དེ། དྲུག་ཅུ་རྩ་བཞི་ལ་གཤེགས་སོ།
།དེའི་སློབ་མ་མེ་ལོང་རྡོ་རྗེ་ནི། སྒྲགས་ཕུར་རྣལ་འབྱོར་པ་བསམ་ཡས་དང་ཡུམ་འབར་མ་གཉིས་ཀྱི་སྲས་སུ་ཆུ་མོ་ཡོས་ལ་འཁྲུངས། ལོ་དགུ་ལ་གྲུབ་ཐོབ་ཟ་ལུང་པ་དང་མཁན་ཆེན་སེ་ལུང་བ་གཉིས་ལ་རབ་ཏུ་བྱུང༌། རངས་མཚོར་བསྒོམས་པས་ཉམས་འབར་ཞིང་མངོན་ཤེས་ཆ་ཕྲ་མོ་ཤར། བཅུ་དྲུག་ལ་སྒྲགས་ཕུའི་ཞོགས་སྟེངས་སུ་ཚོགས་བརྒྱ་ཚར་བྱས་པས་གནས་ལུགས་ཀྱི་དོན་རྟོགས། དེ་ནས་ཡུལ་ཕྱོགས་མང་པོར་བྱོན་ནས་བླ་མ་མང་དུ་བསྟེན། ཤ་བུག་སྟག་སྒོ་དང་མཁར་ཆུ་ལ་སོགས་སུ་དཀའ་ཐུབ་དང་དཀའ་སྤྱད་མང་པོ་མཛད། བཅོ་བརྒྱད་པ་ལྕེགས་སྤྲེ་ལ་སེང་གེ་རྒྱབ་ཏུ་སངས་རྒྱས་དབོན་པོ་ལ་སྙིང་ཐིག་རྣམས་ཞུས། བསྒོམ་པས་ཉིན་ཞག་དྲུག་ཅུ་རྡོ་རྗེ་སེམས་དཔའ་ཉིན་མཚན་མེད་པར་མཐོང༌། དངོས་གཞིའི་དུས་བླ་མ་བརྒྱུད་པ་རྣམས་དང་རྨི་ལམ་དུ་མཇལ་ནས་བྱིན་གྱིས་བརླབས། ཉི་ཤུ་རྩ་གསུམ་པ་ལ་སངས་རྒྱས་རས་པ་ལ་རྡོ་རྗེ་ཕག་མོ་ལ་སོགས་གཏེར་ཆོས་མང་དུ་ཞུས་པས་རྡོ་རྗེ་ཕག་མོ་དང་མཇལ། འོད་ཕུང་གི་དཀྱིལ་ན་བདེ་མཆོག་ལྷན་སྐྱེས། རྟ་མགྲིན། སྒྲོལ་མ། ཐུགས་རྗེ་ཆེན་པོ། ཀུན་བཟང༌། རྡོར་སེམས། བི་མ་ལ། ཨུ་རྒྱན། ཟ་ལུང་པ། སངས་རྒྱས་རས་པ། འགྲོ་མགོན་རིན་པོ་ཆེ་