[A:250]ལའང་ཐོགས་པ་མེད་པའི་ཐུགས་རབ་སྐྱེས། དན་བག་ཏུ་སློབ་དཔོན་གཞོན་ནུ་དོན་གྲུབ་ལ་མདོ་སྒྱུ་འཕྲུལ་སེམས་ཕྱོགས་ལ་སོགས་པ་མང་དུ་ཞུས། ཕྱིས་གསང་བ་སྙིང་པོ་ལ་སྙིང་ཏིག་དང་མཐུན་པའི་ཊི་ཀ་དང་ཡིག་སྣ་འགའ་ཞིག་དང༌། སྙིང་ཐིག་གི་སྐོར་ལ་ཆོས་ཚན་སུམ་ཅུ་རྩ་ལྔ། སྤྱིའི་མིང་དུ་བླ་མ་ཡང་ཏིག་ཏུ་བཏགས་པ་མཛད། དེ་ལ་སོགས་པའི་རྩོམ་པ་མང་དུ་མཛད་ཅིང༌། དབུར་སྟོད་དུ་སྐྱི་ཆུའི་ཆུ་ཕན་ཚུན་གཉིས་ཀར་ཆོས་ཉན་མང་དུ་འཚོགས་པ་ལ། གསང་བ་བླ་ན་མེད་པའི་ཁྲིད་བཏབ། སྐུ་ཚེའི་སྨད་ལ་མཁའ་འགྲོ་སྙིང་ཐིག་ཀྱང་མང་དུ་གསུངས། ཏའི་སི་ཏུ་བྱང་ཆུབ་རྒྱལ་མཚན་དཔོན་གཡོག་གིས་འབྲི་ཁུང་བའི་བླ་མ་ཡིན་ཟེར་ནས་མི་མཐུན་པར་ལྟ་བ་ལ། ཕྱིས་སངས་རྒྱས་དཔལ་རིན་གྱིས་མཚམས་སྦྱར་ཝ་མར་ཁུར། འགྲོ་དོན་རྒྱ་ཆེན་པོ་མཛད་པའི་ངང་ནས་དགུང་ལོ་ལྔ་བཅུ་རྩ་དྲུག་པ་ཆུ་མོ་ཡོས་ལ་གཤེགས། འདི་ལ་ཡུམ་མི་གཅིག་པའི་སྲས་ཀྱང་འགའ་ཞིག་བྱུང༌། སྙིང་ཐིག་སྟོན་པ་པོའི་སྲས་བརྒྱུད་ད་ལྟའི་བར་དུ་མ་ཆད་དེ། ཕལ་ཆེར་ཁྱད་པར་དུ་འཕགས་པས་མང་པོའི་བླ་མར་གྱུར་པ་སྟེ་ངོ་མཚར་ཏོ།
ཡང་མེ་ལོང་པ་ལ་བྱང་སེམས་བསོད་ནམས་བློ་གྲོས་ཞེས་པ། རྟེན་རབ་བྱུང་དུ་བཞུགས་པ་ཞིག་གིས་སྙིང་ཐིག་གསན། དེས་མྱང་སྟོད་ཀྱི་ལྡན་ཡུལ་རི་ཁྲོད་དུ་བཞུགས་ནས། ལོ་རེ་ཞིང་གདུལ་བྱ་མང་པོ་ལ་སྙིང་ཐིག་གི་ཁྲིད་བཏབ།
དེ་ལ་འཇམ་པའི་དབྱངས་བསམ་གྲུབ་རྡོ་རྗེས་གསན་ནས་དེ་ལ་བདག་གི་བླ་མས་གསན་ཏེ་འགྲོ་བ་མང་པོ་ལ་སྙིང་ཐིག་གི་སྒོ་ནས་དོན་