[A:250]la'ang thogs pa med pa'i thugs rab skyes/ dan bag tu slob dpon gzhon nu don grub la mdo sgyu 'phrul sems phyogs la sogs pa mang du zhus/ phyis gsang ba snying po la snying tig dang mthun pa'i Ti ka dang yig sna 'ga' zhig dang / snying thig gi skor la chos tshan sum cu rtsa lnga/ spyi'i ming du bla ma yang tig tu btags pa mdzad/ de la sogs pa'i rtsom pa mang du mdzad cing / dbur stod du skyi chu'i chu phan tshun gnyis kar chos nyan mang du 'tshogs pa la/ gsang ba bla na med pa'i khrid btab/ sku tshe'i smad la mkha' 'gro snying thig kyang mang du gsungs/ ta'i si tu byang chub rgyal mtshan dpon g.yog gis 'bri khung ba'i bla ma yin zer nas mi mthun par lta ba la/ phyis sangs rgyas dpal rin gyis mtshams sbyar wa mar khur/ 'gro don rgya chen po mdzad pa'i ngang nas dgung lo lnga bcu rtsa drug pa chu mo yos la gshegs/ 'di la yum mi gcig pa'i sras kyang 'ga' zhig byung / snying thig ston pa po'i sras brgyud da lta'i bar du ma chad de/ phal cher khyad par du 'phags pas mang po'i bla mar gyur pa ste ngo mtshar to/
yang me long pa la byang sems bsod nams blo gros zhes pa/ rten rab byung du bzhugs pa zhig gis snying thig gsan/ des myang stod kyi ldan yul ri khrod du bzhugs nas/ lo re zhing gdul bya mang po la snying thig gi khrid btab/
de la 'jam pa'i dbyangs bsam grub rdo rjes gsan nas de la bdag gi bla mas gsan te 'gro ba mang po la snying thig gi sgo nas don