[A:256]དཔལ་གདན་བཞི་པ་དང༌། གསང་བ་འདུས་པའི་སྐོར་ལ་སོགས་པ་མང་དུ་བསྒྱུར་མོད་ཀྱི། དེ་བས་ལོ་ཆེན་རིན་ཆེན་བཟང་པོས་གསང་སྔགས་ཀྱི་འགྱུར་མཛད་པ་སྔ་བར་སྣང་སྟེ། འབྲོམ་སྟོན་པ་ཇོ་བོ་སེ་བཙུན་གྱི་གཡོག་བྱེད་པའི་དུས་སྨྲྀ་ཏི་ལ་ལོ་ཙཱ་བསླབས་སོ་ཞེས་འབྱུང་ལ། དེ་དང་ཉེ་བར་འབྲོམ་གྱིས་མངའ་རིས་སུ་བྱོན་པའི་ཚེ། ལོ་ཆེན་གྱི་ལོ་བརྒྱད་ཅུ་རྩ་ལྔ་བཞེས་པའི་ཕྱིར་རོ། །ལོ་ཆེན་གྱིས་དེ་ཉིད་བསྡུས་པ་དང་གསང་བ་འདུས་པ་སོགས་རྣལ་འབྱོར་ཕའི་རྒྱུད་ཤས་ཆེར་བསྒྱུར་ལ། རྣལ་འབྱོར་མའི་རྒྱུད་རྣམས་ནི་ལོ་ཆེན་གྱི་ལོ་ལྔ་བཅུ་ཉེ་བ་ན་བླ་ཆེན་འབྲོག་མི་བྱུང་སྟེ། དེ་ནས་ནི་རྣལ་འབྱོར་མའི་རྒྱུད་རྣམས་ཀྱང་ཤིན་ཏུ་དར་བར་གྱུར་ཏོ། །གསར་མའི་འགྱུར་མགོའི་སྐབས་སོ།། །།
རྣལ་འབྱོར་མའི་རྒྱུད་ཀྱི་བཤད་པའི་དར་སོ་དང་ལམ་འབྲས་བུ་དང་བཅས་པའི་གདམས་པ་ས་སྐྱ་པ་ཡབ་སྲས་ཀྱི་རིང་ལ་ཇི་ལྟར་འཕེལ་བའི་གཏམ་གྱི་སྐབས།
འདི་ལྟར་བསྟན་པ་ཕྱི་དར་གྱི་ཐོག་མར་བྱོན་པའི་ལོ་སྟོན་རྡོ་རྗེ་དབང་ཕྱུག་ལས་བསྟན་པ་འཕེལ་བཞིན་པ་ན། མངའ་བདག་དཔལ་འཁོར་བཙན་གྱི་སྲས་ཁྲི་བཀྲ་ཤིས་བརྩེགས་པ་དཔལ་གྱིས་རུ་ལག་གི་ས་ཆར་རྒྱལ་སྲིད་བསྐྱངས་པའི་སྲས། དཔལ་ལྡེ། འོད་ལྡེ། སྐྱིད་ལྡེ་ཞེས་བྱ་བའི་སྲས་