[A:256]dpal gdan bzhi pa dang / gsang ba 'dus pa'i skor la sogs pa mang du bsgyur mod kyi/ de bas lo chen rin chen bzang pos gsang sngags kyi 'gyur mdzad pa snga bar snang ste/ 'brom ston pa jo bo se btsun gyi g.yog byed pa'i dus smr-i ti la lo tsA bslabs so zhes 'byung la/ de dang nye bar 'brom gyis mnga' ris su byon pa'i tshe/ lo chen gyi lo brgyad cu rtsa lnga bzhes pa'i phyir ro/ /lo chen gyis de nyid bsdus pa dang gsang ba 'dus pa sogs rnal 'byor pha'i rgyud shas cher bsgyur la/ rnal 'byor ma'i rgyud rnams ni lo chen gyi lo lnga bcu nye ba na bla chen 'brog mi byung ste/ de nas ni rnal 'byor ma'i rgyud rnams kyang shin tu dar bar gyur to/ /gsar ma'i 'gyur mgo'i skabs so// //
rnal 'byor ma'i rgyud kyi bshad pa'i dar so dang lam 'bras bu dang bcas pa'i gdams pa sa skya pa yab sras kyi ring la ji ltar 'phel ba'i gtam gyi skabs/
'di ltar bstan pa phyi dar gyi thog mar byon pa'i lo ston rdo rje dbang phyug las bstan pa 'phel bzhin pa na/ mnga' bdag dpal 'khor btsan gyi sras khri bkra shis brtsegs pa dpal gyis ru lag gi sa char rgyal srid bskyangs pa'i sras/ dpal lde/ 'od lde/ skyid lde zhes bya ba'i sras