[A:261]པོའི་དངོས་གྲུབ་བརྙེས་པ་ཞིག་གོ །མདོར་ན་གོང་དུ་བཤད་པའི་ཚུལ་གྱིས། ལོ་ཆེན་རིན་ཆེན་བཟང་པོ་ལ་བརྟེན་ནས་བརྒྱད་སྟོང་པ་དང༌། ཉི་ཁྲི་སྣང་བ་དང༌། བརྒྱད་སྟོང་འགྲེལ་ཆེན་ལ་སོགས་པའི་འགྱུར་མང་པོ་མཛད་ཅིང་གསུངས་པས། ཟབ་མོ་ཤེས་རབ་ཀྱི་ཕ་རོལ་ཏུ་ཕྱིན་པ་དར་བར་གྱུར་པ་ཡང་ཁོང་གི་དྲིན་ལས་ཡིན་ལ། གསང་སྔགས་ཀྱི་རྒྱུད་སྡེའི་ཕྱོགས་རྣམས་ལ་ནི། མཁས་པ་དང༌། སོ་སོར་སྐུ་ཉམས་སུ་བཞེས་པས་གྲུབ་པའི་ཚུལ་ཆེན་པོ་ཡང་མངའ། ཕ་རྒྱུད་མ་རྒྱུད་གཉི་གའི་བཤད་པའི་བཀའ་མང་དུ་བཙུགས། བྱེ་བྲག་ཏུ་རྣལ་འབྱོར་གྱི་རྒྱུད་རྣམས་ཀྱི་རྒྱ་ཆེར་འགྲེལ་པ་དང་ཆོ་ག་རྣམས་ཕྱག་ལེན་དང་བཅས་པར་རྒྱ་ཆེར་སྤེལ་བས་བསྟན་པ་ཤིན་ཏུ་དར་བར་མཛད་ལ། གོང་དུ་སྨོས་པ་བཞིན་བླ་ཆེན་འབྲོག་མིས་མ་རྒྱུད་གཙོ་བོར་མཛད་པའི་བཤད་སྒྲུབ་ཀྱི་བསྟན་པ་དར་བར་མཛད་ཅིང༌། རྗེ་འགོས་ཀྱིས་གསང་བ་འདུས་པ་འཕགས་ལུགས་གཙོ་བོར་མཛད་པའི་བཤད་པ་ལ་བརྟེན་པའི་སློབ་མ་མཁས་པ་རིམ་པ་རིམ་པ་མ་ཆད་པར་འཕེལ་བ་དང༌། རྗེ་མར་པས་ཀྱང་ནཱ་རོ་མི་ཏྲིའི་མན་ངག་གཙོ་བོར་མཛད་ཅིང༌། བཤད་པ་ཡང་འདུས་པ་དང༌། སངས་རྒྱས་ཐོད་པ་དང༌། བརྟག་པ་གཉིས་པ་དང༌། རྡོ་རྗེ་གུར་དང༌། མ་ཧཱ་མཱ་ཡཱ་དང༌། དཔལ་གདན་བཞི་པ་རྣམས་ཀྱི་བཤད་པ་མཛད་པས་ཀྱང༌། སློབ་མ་མཁས་ཤིང་དངོས་གྲུབ་བརྙེས་པས་བོད་ཀྱི་རི་སུལ་ཐམས་ཅད་གང་བར་མཛད་དེ། སྔགས་ཀྱི་བསྟན་པའི་བདག་པོར་གྱུར་པ་ཡིན་ནོ། །བླ་ཆེན་འབྲོག་མིས་སེ་ལ་གསུང་ངག་མ་ལུས་པ་