[A:262]གནང་ཞིང༌། ཞ་མ་ལྕམ་སྲིང་ལ་བརྟེན་ནས་གདམས་པ་འཕེལ་བར་ལུང་བསྟན་པ་བཞིན། ལྕམ་སྲིང་གཉིས་པོས་ཀྱང་སེ་ལ་གསུང་ངག་ལེགས་པར་ཞུས། སྐུ་ཉམས་སུ་ཡང་བཞེས། གཞན་ལ་ཕན་པ་ཡང་རྒྱ་ཆེར་མཛད་དེ། འདི་དག་གི་ལོ་རྒྱུས་ནི་འོག་ཏུ་བྲི་བར་བྱའོ།
བླ་ཆེན་ལ་སློབ་མ་མང་དུ་ཡོད་ཀྱང༌། གཞུང་དང་གདམས་པ་གཉི་གའི་བདག་་པོ་ཆེན་པོར་གྱུར་པ་ནི། དཔལ་ལྡན་ས་སྐྱ་པའི་བླ་མ་རྣམས་ཏེ། དེ་དག་གང་ལས་སུའི་མི་བརྒྱུད་དུ་བྱུང་བའི་རིམ་པ་ཡང༌། བོད་ཡུལ་དུ་ལྷ་སྲིན་དར་བའི་ཚེ་ཡར་ཀླུངས་ཤར་གྱི་གཡའ་སྤང་སྐྱེས་གཅིག་དང་སི་ལི་མ་གཉིས་མཇལ་བར་གྱུར་པ་ན། སྲིན་ཁྲག་མེད་ཀྱང་དེ་ལ་ཆགས་པས་དེ་གཉིས་འཁོན་པའི་བར་དུ་ལྷ་སྲས་སྐྱེས་པ་ལ་ཇོ་བོ་འཁོན་པར་སྐྱེས་ཤེས་གྲགས་པ་ལ། མ་སངས་ལས་འཁོན་ནས་ཀྱི་བརྒྱུད་རིམ་པར་བྱོན་ཞིང༌། རྒྱལ་པོ་ཁྲི་སྲོང་སྡེ་བཙན་གྱི་ནང་བློན་དུ་གཏོགས་པ་འཁོན་དཔལ་བོ་ཆེའི་སྲས་བཞི་སྡེ། ཁྲི་མཛེས་ལྷ་ལེགས། ཚེ་ལ་དབང་ཕྱུག །འཁོན་ཀླུའི་དབང་པོ་བསྲུང་བ། ཚེ་འཛིན་ནོ། །གསུམ་པ་དེ་སད་མི་མི་བདུན་གྱི་དྲུག་པ་ཡིན། བཞི་པའི་སྲས་རྡོ་རྗེ་རིན་པོ་ཆེ་ནས་བུ་བརྒྱུད་རིམ་པ་བཞིན། ཤེས་རབ་ཡོན་ཏན། ཡོན་ཏན་འབྱུང་གནས། ཚུལ་ཁྲིམས་རྒྱལ་པོ། རྡོ་རྗེ་གཙུག་ཏོར། དགེ་སྐྱབས། དགེ་མཐོང༌། བལ་པོ། ཤཱཀྱ་བློ་གྲོས། དེ་དག་ཐམས་ཅད་ཀྱང་གསང་སྔགས་རྙིང་མའི་ཡོན་ཏན་དང་ལྡན་ནོ། །དེ་ལ་སྲས་གཉིས་གཅེན་ཤེས་རབ་ཚུལ་ཁྲིམས་ཚངས་སྤྱོད་བསྲུང༌།