[A:271]
རྨ་ལོ་ཙཱ་བ་དང་ཞ་མ་ལྕམ་སྲིང་གིས་བསྟན་པ་ཇི་ལྟར་བསྐྱངས་པའི་སྐབས།
ཡང་ཞ་མ་ལྕམ་སྲིང་གི་དྲིན་ལས་ལམ་འབྲས་བུ་དང་བཅས་པའི་གདམས་པ་ཇི་ལྟར་འཕེལ་བའི་ཚུལ་བརྗོད་པར་བྱ་སྟེ། དེ་ལ་ཕྱིར་འཕགས་པ་སྤྱན་རས་གཟིགས་དབང་ཕྱུག་གིས་ཆོས་ཀྱི་རྒྱལ་པོ་སྲོང་བཙན་སྒམ་པོར་སྐུ་སྤྲུལ་ཏེ། བོད་འབངས་རྣམས་དགེ་བ་བཅུའི་ལས་ཀྱི་ལམ་ལ་བཀོད། རྗེ་བཙུན་འཇམ་པའི་དབྱངས་ཀྱིས་ཐོན་མི་སམྦྷོ་ཊར་སྐུ་སྤྲུལ་ཏེ། རྒྱ་གར་དུ་པནྚི་ཏ་ལྷའི་རིག་པ་སེང་གེ་ཞེས་བྱ་བ་ལ་བསླབས་ནས་རྒྱ་གར་ཡི་གེ་ལ་མཁས་པར་མཛད་དེ། རྒྱ་གར་གྱི་ཕྱི་མོ་ལྔ་བཅུ། བོད་དུ་ཕྱི་མོ་སུམ་ཅུར་བསྡུས་ནས་སྒྲའི་བསྟན་བཅོས་འགའ་ཞིག་ཀྱང་མཛད། དང་པོར་རྒྱལ་པོ་ལ་ཡི་གེ་ལེགས་པར་བསླབས། ཕྱི་ནས་འབངས་བློ་གསལ་བ་རྣམས་ལ་ཡང་ལེགས་པར་བསླབས་པས་བོད་ཕལ་མོ་ཆེ་ལ་ཁྱབ་ཅིང༌། ཐམས་ཅད་ཀྱང་བཅོམ་ལྡན་འདས་ཀྱི་གསུང་རབ་ལ་བལྟ་བའི་སྐལ་བ་ཅན་དུ་གྱུར། བཅོམ་ལྡན་འདས་འཕགས་མ་སྒྲོལ་མས་ནི། གནས་བརྟན་བཅུ་དྲུག་སྤྱན་འདྲེན་པ་པོ་ཐང་ཐའི་ཛུའི་ཛུང་གི་སྲས་མོ་སྲུལ་གླེན་ཀོང་ཇོ་ཞེས་བྱ་བ། བོད་ཀྱི་སྐད་དུ་ཆུའི་ནང་གི་པད་མ་ཞེས་བྱ་བ་དེར་སྐུ་སྤྲུལ་ནས། འཕྲུལ་སྣང་གི་ཇོ་བོ་འདི་སྤྱན་དྲངས་ཤིང་སྲོང་བཙན་གྱི་བཙུན་མོར་གྱུར་ནས། ཉིད་ཀྱིས་ར་