[A:270]མཛད་པ་ལ། ནང་ཚན་དུ་བཞི་ཐོག་ནས་ཉི་ཤུ་རྩ་ལྔ། ཤར་བས་ཉི་ཤུ་རྩ་ལྔ། ཁང་གསར་ཆེན་མོ་བས་ཉི་ཤུ་རྩ་ལྔ་སྟེ། ལོ་བདུན་ཅུ་རྩ་ལྔའི་རྗེས་ལ་སི་ཏུ་བྱང་ཆུབ་རྒྱལ་མཚན་གྱིས་ས་མོ་གླང་ནས་སའི་བདག་པོ་མཛད་ནས། ལོ་ཉི་ཤུ་རྩ་ལྔ་པ་ཆུ་མོ་གླང་ལ་གུ་ཤྲཱི་བས་ཡར་ཀླུང་ཆོས་འཁོར་མཛད། དེ་ལོ་རང་ཞི་བར་གཤེགས་པས་ཕག་མོ་གྲུ་པ་ལ་ཡང་ཉི་ཤུ་རྩ་ལྔའི་སྐེག་བྱུང་ཞེས་ཟེར་རོ། །ས་སྐྱ་པའི་བླ་མ་གོང་མ་རྣམས་ཀྱི་རིང་ལ་ཨུ་རྒྱན་གྱི་པནྚི་ཏ་ཤེས་རབ་གསང་བ་དང༌། ཕྱིས་པནྚི་ཏ་ཛ་ཡ་སེ་ན་ལ་སོགས་པ་པནྚི་ཏ་མང་པོའང་བྱོན་ཞིང༌། ཕྱིས་འཕགས་པ་རིན་པོ་ཆེའི་རིང་ལ་ཤོང་སྟོན་སྐུ་མཆེད་ལ་སོགས་པའི་ལོ་ཙཱ་བ་ཤིན་ཏུ་མཁས་པ་ཡང་མང་དུ་བྱུང༌། ཚད་མ་རྣམ་འགྲེལ་གྱི་བཤད་པ་ཡང་དབུས་གཙང་གི་ཆོས་སྡེ་ཐམས་ཅད་དུ་དར་བ་ནི། བླ་མ་ཆོས་རྗེ་བའི་དྲིན་ཡིན། འཕགས་པ་རིན་པོ་ཆེ་ཐུགས་དགོངས་བཟང་པས། བོད་ཀྱི་ཆོས་པ་རྣམས་རང་རང་གི་ཆོས་ལུགས་ད་ཡོད་ལ་འབད་པ་གྱིས་ཞེས་ཟེར་བའི་ཧོར་གྱི་འཇའ་ས་བསྒྲགས། སྡེ་སྣོད་འཛིན་པ་ཕལ་མོ་ཆེ་ཟང་ཟིང་གི་ལོངས་སྤྱོད་ཀྱིས་ཀྱང་ཚིམ་པར་མཛད་སྣང་ངོ༌། །རྣལ་འབྱོར་མའི་རྒྱུད་ཀྱི་བཤད་པའི་དར་སོ་དང༌། ལམ་འབྲས་བུ་དང་བཅས་པའི་གདམས་པ་ས་སྐྱ་པ་ཡབ་སྲས་ཀྱི་རིང་ལ་ཇི་ལྟར་འཕེལ་བའི་གཏམ་གྱི་སྐབས་སོ།