[A:281]རྨ་འགྲོངས་ཁར་ཕྱག་དཔེ་ལ་སོགས་པ་ཐམས་ཅད་ཀྱང་གནང་ནས། ཁྱོད་ལ་སྲིད་པ་ཐ་མའི་བྱང་ཆུབ་སེམས་དཔའ་གཅིག་འོང༌། དེའི་སྔོན་དུ་བོད་ཀྱི་མཁས་པ་རྣམས་ལ་ཡང་ཆོས་ཉོན། དེ་རྟིང་རྒྱ་གར་དུ་སོང་ལ་མཻ་ཏྲི་བའི་བརྒྱུད་པ་འཛིན་པ་གཅིག་ལ་གཏུགས་གསུང་བས། འུ་ཡུག་ཏུ་དགེ་བཤེས་ཞང་ལ་འཕགས་ཡོག་དུས་གསུམ་ཐམས་ཅད་བསླབས། རྒྱང་རོང་གངས་པ་ཤའུ་ལ་དེ་ཉིད་འདུས་པ། རྡོ་རྗེ་རྩེ་མོ། དཔལ་མཆོག་གི་རྒྱུད་གསུམ་པོ་ཉན། ལ་སྟོད་གཅུང་པ་མཆོག་དཀར་དུ་མར་པ་སེང་རྫི་ལ་གྲུབ་སྙིང་དང༌། བདེ་མཆོག་བཤད་རྒྱུད་དང་བཅས་པ་གསན། ལོ་ཉི་ཤུ་རྩ་དྲུག་ལ་བལ་པོར་བྱོན་ནས། ཡེ་རང་བའི་སྤྱན་སྔར་མཻ་ཏྲི་བའི་ཆོས་རྣམས་གསན། ཕམ་མཐིང་བ་ལ་དུས་འཁོར་གྱི་གདམས་ངག་དང༌། གདན་བཞིའི་རྒྱུད་རྣམ་གསན། ཨ་ཏུ་ལྱ་བཛྲ་ལ་དགྱེས་པ་རྡོ་རྗེ་འགྲེལ་པ་རིན་ཆེན་ཕྲེང་བ་དང་བཅས་པ་གསན། འཁོན་སྒྱེ་ཆུ་བ་ལ་སམྦྷུ་ཊ་དང༌། སྒྲོན་མ་གསལ་བ་གསན། དམ་པ་སངས་རྒྱས་ལ་ཞི་བྱེད་ཀྱི་གདམས་པ་ལྕམ་སྲིང་གཉི་གས་མང་དུ་གསན་ཞིང་ལུང་བསྟན་ཡང་མཛད། རྟ་ནག་ཏུ་རྟ་ནག་དར་མ་ཀཱིརྟི་ལ་འཇིགས་བྱེད་ཀྱི་རྒྱུད་སྒྲུབ་ཐབས་ཀྱི་དཀྱིལ་འཁོར་ཆོ་ག་དང་བཅས་པ་གསན། རྭ་ལོ་ལ་འཇིགས་བྱེད་ཀྱི་དབང་རྒྱས་པ་ཞུས། ཡང་མི་ཉག་ལོ་ཙཱ་བས་ཇོ་བོ་སུ་ན་ཡ་ཤྲཱི་བོད་དུ་སྤྱན་དྲངས་པ་ལ། རྡོ་རྗེ་ཕྲེང་བའི་དབང་དང༌། དབུ་ཚད་ཀྱི་གཞུང་ཆེ་བ་རྣམས་གསན་ཞིང་དགོངས་པ་ལོན་པར་མཛད། སྔར་ཡང་བལ་པོར་བྱོན་ནས་རྒྱ་གར་གྱི་བླ་མ་མི་མཉམ་