[A:283]ཡུལ་ཐམས་ཅད་དུ་སྙན་པས་ཁྱབ། དུས་ཕྱིས་བླ་མ་སོ་སོའི་རྣམ་ཐར་དུ་ཡང་ལྕམ་སྲིང་གཉིས་ཀྱི་ཞལ་མཐོང་བ་ལ་ཡ་མཚན་དུ་བྱས་ནས་ཡི་གེར་འབྲིའོ། །དེ་ལྟར་རྗེ་འཁོན་ཕུ་བ་ཞེས་གྲགས་ཤིང༌། མཚན་དངོས་ཆོས་ཀྱི་རྒྱལ་པོ་ཞེས་བྱ་བ་དེ་གཞན་དོན་རྒྱ་ཆེན་པོ་མཛད་པའི་ངང་ནས་བདུན་ཅུ་རྩ་དྲུག་པ་ཤིང་ཕོ་བྱི་བའི་ལོ་ལ་གཤེགས་སོ། །རྗེ་དེའི་སྲས་ལྷ་རྗེ་ཟླ་བ་འོད་ཟེར་ནི། ཡབ་ཀྱི་ལྔ་བཅུ་རྩ་ལྔར་ཆུ་མོ་ཡོས་ལ་འཁྲུངས་ཤིང༌། དྷརྨ་པའི་སྐྱེ་བ་ཡིན་པར་གྲགས། ལོ་གཉིས་ལོན་པའི་ཚེ་ཡུམ་གཤེགས་ནས། ལྷ་རྗེ་མས་ཕྱག་གི་སྲིན་ལག་ལས་འོ་མའི་རྒྱུན་ཕབ་སྟེ་ལོ་བཅུའི་བར་དུ་གསོས། བཅུ་དྲུག་ལོན་པའི་ཚེ་འུ་ཡུག་གི་ཞང་རྒྱ་མ་བ། གངས་པ་ཤེའུ། རོང་ཟོམ་ཆོས་ཀྱི་བཟང་པོ་ལ་སོགས་པ་ཡབ་ཀྱི་བཞིན་དུ་གསན་པ་རྒྱ་ཆེར་མཛད། སྔར་བཅུ་བཞི་ལོན་པའི་ཚེ་པ་ཚབ་རྒྱ་གར་ལ་འབྱོན་པའི་ཕྱགས་ཕྱིར་འབྱོན་སྙམ་ཡོད་པ་ལ། ཡབ་ཀྱི་ཞལ་ནས། གདམས་པ་ངེད་རང་ལས་ཆེ་བ་མེད་པས་འདི་ཉིད་དུ་སྡོད་ལ་ཉོན་གསུང་བ་བཞིན། ཕྱིས་ལྕམ་སྲིང་གཉིས་ལ་དབང་གདམས་པ་མ་ལུས་པར་ཞུས། གཞན་བལ་པོར་ཡང་ཛ་ཡ་སེ་ན་ལ་སོགས་པའི་བླ་མ་མང་དུ་བསྟེན། ཡབ་ཀྱི་ལུགས་བཞིན་དུ་གདམས་ངག་དབང་བསྐུར་སྡེ་སྟོང་ཀྱི་བཤད་པ་གསུམ་གྱིས་ཡུལ་དང་ཡུལ་རྣམས་སུ་གདུལ་བྱ་མཐའ་ཡས་པ་བསྐྱངས། མཁས་པའི་སྙན་པས་སྟོད་ལུངས་རྒྱ་དམར་བ་ལ་སོགས་པས་ཀྱང་ཞབས་ལ་གཏུགས། ཟང་ཟིང་གི་ལོངས་ལ་མངའ་བརྙེས་པས་ལྕམ་སྲིང་གི་དགོངས་པ་རྫོགས་ཐབས་སྐྱེ་བོ་མང་