[A:324]སྒོམ་པ་རིན་ཆེན་བླ་མ། ཨ་མེས་སྨན་རྒན། སྒ་སྒོམ་ཨག་ཚོགས། སྟོན་པ་དབང་ཕྱུར་འབར། ཕ་རྒན་ལྡོང་སྟོན། ཇོ་བོ་ལེགས། ཁམ་པ་ལུང་པ་ཆེན་པོ། སྐུ་མཆེད་སུམ་ལ་སོགས་པ་རྣམས་སོ། །འབྲོམ་དེ་ནི་སྔགས་མཚན་ཉིད་གཉིས་ཀའི་ཡོན་ཏན་ཤིན་ཏུ་ཆེ་སྟེ། གསང་སྔགས་ནི་སྦས་ཏེ་ཆེར་མ་གསུངས་ལ། མཚན་ཉིད་ལ་ནི་བརྒྱད་སྟོང་པ་དང༌། བརྒྱད་སྟོང་འགྲེལ་ཆེན་དང༌། འགྲེལ་ཆུང་དང༌། ཉི་ཁྲི་སྣང་བ་ལ་སོགས་པ་དང༌། སྔགས་ཀྱི་ཡང་ཡེ་ཤེས་གྲུབ་པ་ལ་འགྱུར་བཅོས་མཛད་སྣང༌། ཁོ་བོའི་དབུ་མའི་ལྟ་བ་ལྕི་ཡང་མ་ཡིན་པ་བྱ་བ་ཡིན་གསུང་སྟེ། དོན་མེད་པར་དགག་པ་སྟེ། ཆོས་ཀྱི་གྲགས་པས། མེད་པར་དགག་པ་ནི་ཅི་ཡང་མ་ཡིན་པའི་ཕྱིར་རོ། །ཞེས་གསུངས་པ་བཞིན་ནོ། །ཁོང་གཤེགས་པའི་རྗེས་ལ་རྣལ་འབྱོར་པ་ཆེན་པོས་གདན་ས་མཛད་དེ། དེ་ཡང་ཇོ་བོའི་ཆིབས་པ་སྐྱོང་བ་དང་ནང་ལས་རྣམས་ཀྱང་མཛད་ཅིང༌། དང་པོར་ཉན་ཚོར་མཇལ་ནས་ཇོ་བོའི་ཆོས་རྣམས་ལེགས་པར་གསན། ཞབས་ཏོག་གི་ཚེའང་སྒོམ་པ་ཁོ་ན་ལ་གཙོ་བོར་མཛད་པས་རྣལ་འབྱོར་པར་བཏགས། ཇོ་བོའི་བཞེད་པའི་བདེན་པ་གཉིས་ལ་འབྲོམ་སྟོན་པ་ལས་ཀྱང་ཁོང་མཁས་ཟེར། ཤིང་མོ་སྦྲུལ་ནས་ས་ཕོ་རྟའི་བར་ལོ་བཅུ་བཞི་གདན་ས་མཛད། རྭ་སྒྲེང་གི་ཁྱམས་སྨད་ལ་སོགས་འབྲོམ་སྟོན་གྱིས་མཛད་པའི་ལྷག་མ་རྣམས་བསྒྲུབ་པའི་ཕྱིར་འབད་པ་མཛད་པ་ལ། དང་པོར་དཀའ་སེ་བྱུང་ཡང་ཕྱིས་སྐུ་བསོད་རྒྱས་ཏེ་བཞེད་པ་རྣམས་གྲུབ། དེ་ཡང་ཤིང་མོ་ཡོས་ལ་འཁྲུངས་ནས་ས་ཕོ་རྟའི་བར་དུ་དྲུག་ཅུ་རྩ་གསུམ་བཞུགས། འདིའི་སློབ་