[A:324]sgom pa rin chen bla ma/ a mes sman rgan/ sga sgom ag tshogs/ ston pa dbang phyur 'bar/ pha rgan ldong ston/ jo bo legs/ kham pa lung pa chen po/ sku mched sum la sogs pa rnams so/ /'brom de ni sngags mtshan nyid gnyis ka'i yon tan shin tu che ste/ gsang sngags ni sbas te cher ma gsungs la/ mtshan nyid la ni brgyad stong pa dang / brgyad stong 'grel chen dang / 'grel chung dang / nyi khri snang ba la sogs pa dang / sngags kyi yang ye shes grub pa la 'gyur bcos mdzad snang / kho bo'i dbu ma'i lta ba lci yang ma yin pa bya ba yin gsung ste/ don med par dgag pa ste/ chos kyi grags pas/ med par dgag pa ni ci yang ma yin pa'i phyir ro/ /zhes gsungs pa bzhin no/ /khong gshegs pa'i rjes la rnal 'byor pa chen pos gdan sa mdzad de/ de yang jo bo'i chibs pa skyong ba dang nang las rnams kyang mdzad cing / dang por nyan tshor mjal nas jo bo'i chos rnams legs par gsan/ zhabs tog gi tshe'ang sgom pa kho na la gtso bor mdzad pas rnal 'byor par btags/ jo bo'i bzhed pa'i bden pa gnyis la 'brom ston pa las kyang khong mkhas zer/ shing mo sbrul nas sa pho rta'i bar lo bcu bzhi gdan sa mdzad/ rwa sgreng gi khyams smad la sogs 'brom ston gyis mdzad pa'i lhag ma rnams bsgrub pa'i phyir 'bad pa mdzad pa la/ dang por dka' se byung yang phyis sku bsod rgyas te bzhed pa rnams grub/ de yang shing mo yos la 'khrungs nas sa pho rta'i bar du drug cu rtsa gsum bzhugs/ 'di'i slob