[A:335]པ་གནས་ན་བཞུགས་པའི་སྤྱན་སྔར་བྱོན། ཚོགས་ཆོས་གསན་པས་བློ་སྦྱོང་གི་ཚིག་གསལ་བར་མ་བྱུང་བ་ལ། ཉིན་ཞིག་གྲྭ་པ་རྣམས་སྟོན་མོ་ལ་སོང་ནས་དགེ་བའི་བཤེས་གཉེན་པ་འབུམ་པ་ལ་སྐོར་བ་མཛད་པའི་དྲུང་དུ་ཕྱིན་ནས། རང་གི་ཆམ་ཚེ་བཏིང་ནས་འདིར་བཞུགས་པ་ཞུ་དང་ཞུས་པས། དེར་བསྡད་ནས་ཅི་བྱེད་གསུང༌། གྲོས་ཤིག་ཞུ་བ་ལགས་བྱས་པས། གྲོས་ཐག་ཐམས་ཅད་ཆོས་ཁྲི་ཁ་ནས་བཅད་པ་ཡིན་ཏེ། དེར་མ་ཆོད་པ་ཅི་ཡོད་གསུང༌། བློ་སྦྱོང་གི་ཚིག་རྣམས་སྙན་དུ་ཕུལ། འདི་འདྲ་བ་ཞིག་འདུག་པ་ལ་ཁོ་བོ་མོས་པར་བྱུང་བས་ལམ་དུ་འགྱུར་རམ་མི་འགྱུར་ཞུས་པས། དགེ་བའི་བཤེས་གཉེན་པའི་ཞལ་ནས། ཇོ་བོ་སྟོན་པ་ཁྱོད་མོས་མི་མོས་ཀྱི་ཁ་ན་ཅི་ཡོད། སངས་རྒྱས་མི་སྒྲུབ་ན་ཕར་ཞོག སྒྲུབ་ན་སེམས་དེ་འདྲ་བ་ལ་མ་བརྟེན་པར་འགྲུབ་མི་སྲིད་གསུང༌། འོ་ན་ལུང་ཞིག་དང་བར་ཞུ་དང་བྱས་པས་མགོན་པོ་ཀླུ་སྒྲུབ་ལ་ཚད་མར་མི་འཛིན་པ་སུ་ཡོད་གསུང་ནས། བདག་ལ་དེ་དག་སྡིག་སྨིན་ཅིང༌། བདག་དགེ་མ་ལུས་དེར་སྨིན་ཤོག །ཅེས་བྱ་བ་མི་གདའ་འམ་གསུང༌། འོ་ན་ད་དེའི་གདམས་པ་ཞིག་གནང་བར་ཞུ་འཚལ་བྱས་པས། ཇོ་བོ་རང་གིས་རྐྱེན་ཐུབ་པར་གྱིས་ཤིག །ངས་གདམས་ངག་རིམ་གྱིས་བྱའི་གསུང༌། དེར་བློ་སྦྱོང་གི་ཁྲིད་ཚར་གཅིག་ལ་ལོ་བཅུ་གསུམ་བྱས་པས། ཇི་ལྟ་བ་བཞིན་དུ་ཐུགས་རྒྱུད་ལ་སྐྱེས་ནས། བདག་ཉིད་མོས་པ་མང་བའི་རྒྱུས། བདེ་སྡུག་གཏམ་ངན་ཁྱད་བསད་ནས། བདག་འཛིན་འདུལ་བའི་གདམས་ངག་ཞུས། ད་ནི་ཤི་ཡང་མི་འགྱོད་དོ། །གསུང་བའི་ཚིག་ཡི་གེར་བྲིས།