[A:335]pa gnas na bzhugs pa'i spyan sngar byon/ tshogs chos gsan pas blo sbyong gi tshig gsal bar ma byung ba la/ nyin zhig grwa pa rnams ston mo la song nas dge ba'i bshes gnyen pa 'bum pa la skor ba mdzad pa'i drung du phyin nas/ rang gi cham tshe bting nas 'dir bzhugs pa zhu dang zhus pas/ der bsdad nas ci byed gsung / gros shig zhu ba lags byas pas/ gros thag thams cad chos khri kha nas bcad pa yin te/ der ma chod pa ci yod gsung / blo sbyong gi tshig rnams snyan du phul/ 'di 'dra ba zhig 'dug pa la kho bo mos par byung bas lam du 'gyur ram mi 'gyur zhus pas/ dge ba'i bshes gnyen pa'i zhal nas/ jo bo ston pa khyod mos mi mos kyi kha na ci yod/ sangs rgyas mi sgrub na phar zhog sgrub na sems de 'dra ba la ma brten par 'grub mi srid gsung / 'o na lung zhig dang bar zhu dang byas pas mgon po klu sgrub la tshad mar mi 'dzin pa su yod gsung nas/ bdag la de dag sdig smin cing / bdag dge ma lus der smin shog /ces bya ba mi gda' 'am gsung / 'o na da de'i gdams pa zhig gnang bar zhu 'tshal byas pas/ jo bo rang gis rkyen thub par gyis shig /ngas gdams ngag rim gyis bya'i gsung / der blo sbyong gi khrid tshar gcig la lo bcu gsum byas pas/ ji lta ba bzhin du thugs rgyud la skyes nas/ bdag nyid mos pa mang ba'i rgyus/ bde sdug gtam ngan khyad bsad nas/ bdag 'dzin 'dul ba'i gdams ngag zhus/ da ni shi yang mi 'gyod do/ /gsung ba'i tshig yi ger bris/