[A:354]ཉེ་བར་གཟིམས་མལ་བཅས་ནས་བསྒོམས། ཕྱིས་ནི་སློབ་མ་རྣམས་ལ་སྒོམ་དུ་གཞུག་པའི་ཚེ་རོལ་མོ་དཀྲོལ་ཞིང་སྒོམ་དུ་གཞུག གཞན་གྱིས་བལྟས་ན་རོལ་མོ་དཀྲོལ་བ་ཁོ་ན་ལ་དགྱེས་པ་ཡིན་ནམ་སྙམ་པ་བྱུང༌། སྤྱན་སྔ་གཤེགས་ཁར་ཁྱོད་བསྙེན་རྫོགས་མ་བྱེད་ཅིག་གསུང་བས་བསྙེན་རྫོགས་ཡུན་རིང་དུ་མ་གྲུབ། ཕྱིས་གསོལ་བ་བཏབ་པས་གདུང་རྟེན་གཅིག་ལ་ལུགས་ལན་གཉིས་མི་དགོས་གསུང་བ་རྨིས། ཡང་གསོལ་བ་བཏབ་པས་སྣམ་སྦྱར་རྒྱ་གར་མ་ཞིག་གནང་བ་རྨིས་པས། དགེ་སློང་བྱེད་པར་གནང་བ་ཡིན་སྙམ་ནས་དགེ་བཤེས་རྔོག་ཆོས་དབང་གིས་མཁན་པོ་མཛད་མང་རས་སློབ་དཔོན་མཛད། རྒྱ་ཤེས་རབ་འབར་གྱིས་གསང་སྟེ་མཛད་ནས་བསྙེན་པར་རྫོགས། གླང་ཐང་པ་ལ་མདོ་རྩ་ཚར་གཅིག །ཤེས་རབ་འབར་ལ་ཚར་གསུམ་སྟེ་ཚར་བཞི་གསན། གཞན་གྱིས་ཆོས་གསན་དུས་ན་ཟིན་བྲིས་མཛད་དམ་མ་མཛད་ཞུས་པས། ཟིན་བྲིས་འདྲ་བས་གར་ཡང་མི་ཕྱིན། ཆོས་ཐམས་ཅད་དུས་གཅིག་ལ་ལམ་ཤེས་དགོས་པ་ཡིན་གསུང༌། དེ་ནས་བྱ་ཡུལ་བ་རྣམས་ཁྱེད་རང་གིས་མདུན་མ་བྱུང་ན་ཆ་རྐྱེན་འཐོག་པ་མེད་ཅིག་གསུང་བ་དང༌། སང་ཕོད་མྱ་ངན་ལས་འདའ་བའི་ད་ལོ་སྤྱན་སྔའི་འདས་མཆོད་དུ་བུ་རམ་ལག་པས་ཐེག་ཚད་རེ་བཀྱེ། ཕྱིས་འགྲུབ་པའི་ངེས་པ་མེད་གསུང་བ་ལ། མྱུར་དུ་མྱ་ངན་ལས་འདའ་བའི་གསུང་ཡིན་པར་མ་གོ །དེ་ལྟར་བསྟན་པའི་བྱ་བ་རྒྱ་ཆེན་པོ་མཛད་ནས། དགུང་ལོ་དྲུག་ཅུ་རྩ་བཞི་པ་ས་ཕོ་རྟའི་སྨིན་དྲུག་ཟླ་བའི་ཚེས་བཅོ་བརྒྱད་ལ་དང་པོར་སྐྱིལ་དཀྲུང་མཛད་ནས་ཐུགས་དམ་མཛད། དེ་རྟིང་སྒོམ་པ་བྱང་བླ་ལ་གཉེས་སེ་མཛད་ནས་སེང་