[A:381]པས་དགྱེར་སྒོམ་ཞེས་གྲགས། མཚན་ནི་གཞོན་ནུ་གྲགས་པ་ཞེས་བགྱི། དེས་རིན་ཆེན་སྒང་གི་གཙུག་ལག་ཁང་སྡེ་དགོན་དང་བཅས་པ་བཏབ་ཅིང༌། འགྲོ་བའི་དོན་རྒྱ་ཆེན་པོ་མཛད། ཚོགས་པའང་བརྒྱད་བརྒྱ་ཙམ་འཚོགས། རང་ལོ་བརྒྱད་ཅུ་རྩ་གཉིས་པ་ལྕགས་མོ་ཡོས་ལ་གཤེགས། དགྱེར་སྒོམ་ཆེན་པོའི་གཅུང་པོ་བུ་མོ་སྟག་གི་སྲས་དབོན་སྟོན་རིན་པོ་ཆེ་དེ་ནི། བསྐལ་པ་བཟང་པོའི་སངས་རྒྱས་སུ་འགྱུར་བ་བྱང་ཆུབ་སེམས་དཔའ་སྐལ་ལྡན་ཤིང་རྟ་ཉིད་སྐྱེ་བ་བཞེས་པར་གྲགས། དེ་ཡང་སིངྒའི་གླིང་ན་དགྲ་བཅོམ་པ་ཞིག་བཞུགས་པ་དེས། ཁ་ཆེའི་པནྚི་ཏ་ཆེན་པོ་ཤཱཀྱ་ཤྲཱིའི་གཅུང་པོ་ཞིག་ལ་མེ་ཏོག་བཞི་ཟ་མ་ཏོག་ཏུ་བཅུག་སྟེ། དགྲ་བཅོམ་པ་དེའི་ཞལ་ནས་མེ་ཏོག་འདི་རྣམས་ཁྱེད་ཀྱི་ཕུ་བོ་དེ་བོད་དུ་འགྲོ་བར་འདུག་པས་དེ་ལ་བསྐུར་ལ། གཅིག་འབྲི་ཞེས་བྱ་བའི་ས་ཕྱོགས་ན་སློབ་དཔོན་ཀླུ་སྒྲུབ་བྱང་ཆུབ་སེམས་དཔའ་རིན་ཆེན་དཔའ་ཞེས་བྱ་བར་སྐྱེ་བ་བླངས་ཡོད་པས། མེ་ཏོག་གཅིག་དེ་ལ་སྤྲོད། གཅིག་ནི་རཏྣ་ཀཱུ་ཊི་ཞེས་བྱ་བའི་གཙུག་ལག་ཁང་ན་བྱང་ཆུབ་སེམས་དཔའ་སྐལ་ལྡན་ཤིང་རྟའི་སྐྱེ་བ་ཡོད་པས་དེ་ལ་སྤྲོད། གཅིག་དྭི་བྷཱ་ཥི་ཞིག་ཡོད་པ་དེ་ལ་སྤྲོད། གཅིག་དྭི་བྷཱ་ཥི་དེས་ལྷ་ཆེན་པོ་ཞིག་བཞེངས་པ་དེའི་ཐུགས་ཀར་ཞོག་ཅེས་གསུངས་པ་བཞིན་དུ། ཁ་ཆེའི་པནྚི་ཏ་ཆེན་པོས་ཀྱང་དེ་རྣམས་ལེགས་པར་སྤྲད། ཁ་ཆེའི་པནྚི་ཏ་བསམ་ཡས་སུ་བཞུགས་པའི་ཚེ་རྗེ་བཙུན་མ་སྒྲོལ་མ་ལ། དབོན་སྟོན་བྱང་ཆུབ་སེམས་དཔའ་སྐལ་ལྡན་ཤིང་རྟ་ལགས་སམ་ཞུས་པས། འཕགས་མའི་ཞལ་ནས། སྐལ་ལྡན་ནི་ཡིན།