[A:381]pas dgyer sgom zhes grags/ mtshan ni gzhon nu grags pa zhes bgyi/ des rin chen sgang gi gtsug lag khang sde dgon dang bcas pa btab cing / 'gro ba'i don rgya chen po mdzad/ tshogs pa'ang brgyad brgya tsam 'tshogs/ rang lo brgyad cu rtsa gnyis pa lcags mo yos la gshegs/ dgyer sgom chen po'i gcung po bu mo stag gi sras dbon ston rin po che de ni/ bskal pa bzang po'i sangs rgyas su 'gyur ba byang chub sems dpa' skal ldan shing rta nyid skye ba bzhes par grags/ de yang singga'i gling na dgra bcom pa zhig bzhugs pa des/ kha che'i panTi ta chen po shAkya shrI'i gcung po zhig la me tog bzhi za ma tog tu bcug ste/ dgra bcom pa de'i zhal nas me tog 'di rnams khyed kyi phu bo de bod du 'gro bar 'dug pas de la bskur la/ gcig 'bri zhes bya ba'i sa phyogs na slob dpon klu sgrub byang chub sems dpa' rin chen dpa' zhes bya bar skye ba blangs yod pas/ me tog gcig de la sprod/ gcig ni ratna kU Ti zhes bya ba'i gtsug lag khang na byang chub sems dpa' skal ldan shing rta'i skye ba yod pas de la sprod/ gcig dwi bhA Shi zhig yod pa de la sprod/ gcig dwi bhA Shi des lha chen po zhig bzhengs pa de'i thugs kar zhog ces gsungs pa bzhin du/ kha che'i panTi ta chen pos kyang de rnams legs par sprad/ kha che'i panTi ta bsam yas su bzhugs pa'i tshe rje btsun ma sgrol ma la/ dbon ston byang chub sems dpa' skal ldan shing rta lags sam zhus pas/ 'phags ma'i zhal nas/ skal ldan ni yin/