[A:58]པོ་བསྙེན་པར་རྫོགས་ཤིང༌། རྡོ་རྗེ་དཔལ་དང་བྱང་ཆུབ་དཔལ་ཞེས་བྱ་བ་ལས་རིམ་གྱིས་ཚོགས་པ་སྡེ་བཞི་པོ་འདི་བྱུང་བ་ཡིན་ནོ། །ཐུབ་པའི་དབང་པོ་གཉིས་པ་རྗེ་བཙུན་ཙོང་ཁ་པ་ཆེན་པོའི་ཡང་དགེ་སློང་གི་དངོས་པོ་ནི་པཎ་ཆེན་གྱི་བརྒྱུད་པ་ལས་བརྙེས་སོ། །འཇམ་དཔལ་རྩ་བའི་རྒྱུད་ལས། །དེ་བཞིན་གཤེགས་པ་ང་འདས་ནས། །ལོ་ནི་བཞི་བརྒྱ་ལོན་པ་ན། །དགེ་སློང་ཀླུ་ཞེས་དེ་འབོད་འབྱུང༌། །བསྟན་པ་འདི་ལ་དད་ཅིང་ཕན། །རབ་ཏུ་དགའ་བའི་ས་ཐོབ་པ། །ལོ་ནི་དྲུག་བརྒྱ་དག་ཏུ་འཚོ། །རིག་པ་རྨ་བྱ་ཆེན་མོ་ནི། །བདག་ཉིད་ཆེན་པོ་དེས་ཀྱང་འགྲུབ། །བསྟན་བཅོས་སྣ་ཚོགས་དོན་དང་ནི། །དངོས་པོ་མེད་པའི་དོན་དེ་རིག །གང་ཚེ་ལུས་དེ་བོར་བ་ན། །བདེ་བ་ཅན་དུ་སྐྱེ་བར་འགྱུར། །དེ་ནི་མཐར་གྱིས་སངས་རྒྱས་ཉིད། །ངེས་པ་ཁོ་ནར་ཡང་དག་འཐོབ། །ཅེས་བྱ་བ་དང༌། ཐོགས་མེད་ཅེས་བྱའི་དགེ་སློང་ནི༌། །བསྟན་བཅོས་དེ་ནི་དོན་ལ་མཁས། །མདོ་སྡེ་ངེས་དོན་དྲང་བའི་དོན། །རྣམ་པ་མང་པོ་རབ་ཏུ་འབྱེད། །འཇིག་རྟེན་རིག་པ་སྟོན་བདག་ཉིད། །གཞུང་བྱེད་ངང་ཚུལ་ཅན་དུ་འགྱུར། ཞེས་ལུང་བསྟན་པའི་སློབ་དཔོན་གཉིས་ཀྱིས་སོ་སོ་ཐར་པ་དང་ཐེག་པ་ཆེན་པོའི་ཚུལ་རྒྱས་པར་མཛད་དེ། །ཀླུ་སྒྲུབ་འཇིག་རྟེན་དུ་བྱུང་བ་ན་དགེ་སློང་བྱི་བོ་མང་པོ་ཡོད་པ་དེ་རྣམས་སློབ་དཔོན་གྱིས་བསྐྲད་དེ། །།བསྟན་པ་རྒྱས་པར་མཛད་དོ། །འདིར་བསྐལ་བཟང་གི་སངས་རྒྱས་སྐལ་ལྡན་ཤིང་རྟར། རྗེ་བཙུན་མས་ཁ་ཆེ་པཎ་ཆེན་ལ་ལུང་བསྟན་པའི་རྒྱ་མ་དབོན་སྟོན་གྱི་གསུང་