[A:70]ལྕགས་རི་དང་བཅས་པ་ལེགས་པར་གྲུབ། བཙན་པོས་རྟ་མགྲིན་བསྒྲུབས་པས་གྲུབ་སྟེ། ཛམྦུའི་གླིང་ཙམ་དུ་གྲགས་པའི་རྟ་སྐད་ཆེན་པོ་བྱུང༌། དང་པོར་སད་མི་མི་བདུན་རབ་ཏུ་ཕྱུང༌། དེ་ན་དད་པ་ཅན་དང་ཤེས་རབ་ཅན་མང་དུ་རབ་ཏུ་བྱུང་ནས། རྒྱལ་པོ་ཉིད་ཀྱི་རིང་ལ་ཁམས་ཡན་ཆད་དུ་ཆོས་ཀྱི་གྲྭ་ཆེན་པོ་བཅུ་གཉིས་བཙུགས། ཡེར་པ་དང་མཆིམས་ཕུར་སྒོམ་གྲྭ་བཙུགས་ཏེ། ཡེར་པ་ནས་ནམ་མཁའ་ལ་འཕུར་བ་མང་པོ་བྱུང་ཞེས་གྲགས། རབ་ཏུ་བྱུང་བ་ཐམས་ཅད་ཀྱི་འཚོ་བ་བླ་ནས་སྦྱོར། སྔགས་མཚན་ཉིད་ཀྱི་ཆོས་ཕལ་མོ་ཆེ་བསྒྱུར་ཞིང་ཉན་བཤད་ཀྱིས་གཏན་ལ་ཕབ། དུས་ཕྱིས་དཱི་པཾ་ཀ་རའི་ཞལ་ནས། དེ་དུས་ཀྱི་བོད་ཀྱི་བསྟན་པ་འདྲ་བ་རྒྱ་གར་དུ་ཡང་མ་བྱུང་བ་འདུག་གསུངས་པ་ཡིན། དེ་ནས་རལ་པ་ཅན་ཡན་ཆོད་དུ་ཡབ་མེས་ཀྱི་མཛད་པ་ཡང་དག་པ་རྗེས་སུ་བསྐྱངས་ཏེ། དེ་ལྟ་བུའི་ཡོན་མཆོད་རྣམས་ལ་གུས་པ་ཆེན་པོས་ཕྱག་བྱ་བར་རིགས་སོ། །ཆོས་རྒྱལ་མེས་དབོན་རྣམས་ཀྱིས་བསྟན་པ་བཙུགས་པའི་སྐབས་སོ། །
བོད་ཀྱི་རྒྱལ་པོ་རྣམས་རྩ་རྒྱུད་ལས་ལུང་བསྟན་པའི་སྐབས།
སྲོང་བཙན་ནས་འོད་སྲུངས་ཀྱི་བར་ནི། །འཇམ་དཔའ་རྩ་བའི་རྒྱུད་ལས། །དེ་བཞིན་གཤེགས་པའི་བསྟན་འདི་ལ། །རྣམ་པ་སྣ་ཚོགས་བྱ་བ་