[A:70]lcags ri dang bcas pa legs par grub/ btsan pos rta mgrin bsgrubs pas grub ste/ dzambu'i gling tsam du grags pa'i rta skad chen po byung / dang por sad mi mi bdun rab tu phyung / de na dad pa can dang shes rab can mang du rab tu byung nas/ rgyal po nyid kyi ring la khams yan chad du chos kyi grwa chen po bcu gnyis btsugs/ yer pa dang mchims phur sgom grwa btsugs te/ yer pa nas nam mkha' la 'phur ba mang po byung zhes grags/ rab tu byung ba thams cad kyi 'tsho ba bla nas sbyor/ sngags mtshan nyid kyi chos phal mo che bsgyur zhing nyan bshad kyis gtan la phab/ dus phyis dI paM ka ra'i zhal nas/ de dus kyi bod kyi bstan pa 'dra ba rgya gar du yang ma byung ba 'dug gsungs pa yin/ de nas ral pa can yan chod du yab mes kyi mdzad pa yang dag pa rjes su bskyangs te/ de lta bu'i yon mchod rnams la gus pa chen pos phyag bya bar rigs so/ /chos rgyal mes dbon rnams kyis bstan pa btsugs pa'i skabs so/ /
bod kyi rgyal po rnams rtsa rgyud las lung bstan pa'i skabs/
srong btsan nas 'od srungs kyi bar ni/ /'jam dpa' rtsa ba'i rgyud las/ /de bzhin gshegs pa'i bstan 'di la/ /rnam pa sna tshogs bya ba