[A:752]པའི་བར་མཛད། དེ་ནས་སྟག་ལུང་དུ་ཕེབས་ནས་ཁྲིད་ཁ་གྲངས་མེད་པ་བཏབ་སྟེ་ཆོས་ཀྱི་འཁོར་ལོ་རྒྱ་ཆེན་པོ་བསྐོར། མཛད་སྤྱོད་རྣམ་ཐར་ཐམས་ཅད་བླ་མ་གོང་མའི་རྗེས་སུ་འཇུག སྙན་པའི་གྲགས་པས་ཀྱང་ཕྱོགས་ཐམས་ཅད་དུ་ཁྱབ་པར་གྱུར་ཏོ། །གླིང་གསེབ་ཏུ་ཤ་མི་འགྲིམ་པའི་ཁྲིམས་ཀྱང་རིན་པོ་ཆེ་འདིས་མཛད། སྐབས་ཤེད་དུ་རྗེ་བཙུན་སྤྱི་ལྷས་པའི་གདན་ས་བ་འཕགས་པའི་སྤྲུལ་པར་གྲགས་པ་དེ་ལ་འབུལ་བ་དང༌། དགེ་འདུན་ལ་མང་ཇ་བསྐུར་བས་མནལ་ལམ་དུ་རིན་པོ་ཆེའི་པྲོག་ཞུ་རིགས་ལྔས་བརྒྱན་པ་ཅིག་དབུ་ལ་གསོལ་བ་རྨིས། བསྟན་པའི་བདག་པོར་དབང་བསྐུར་བའི་མཚན་ལྟས་དུ་མ་ལ་བརྟེན་ནས། སྤྱིར་བསྟན་པའི་དར་རྒྱས་དང༌། ཁྱད་པར་ཀུན་སྤངས་ནམ་མཁའ་དཔལ་བཟང་པོའི་ཐུགས་དགོངས་རྫོགས་པའི་ཕྱིར་དུ་དབུས་གཙང་གི་སྡེ་དགོན་ཐམས་ཅད་དུ་མང་སྐོལ་གྱི་རྣམ་བཞག་རྒྱ་ཆེན་པོ་མཛད། དེའི་ཕྱི་ཞིག་ནས་ལོ་བཞིར་སྐུ་མཚམས་ཤིན་ཏུ་དམ་པ་ལ་བཞུགས་ཏེ། ཏིང་ངེ་འཛིན་ལ་མཉམ་པར་བཞག་པས་ལྷོངས་ཆེན་པོ་བྱུང༌། དེ་ནས་ཆོས་རྗེ་ཀུན་བཀྲས་བ་རྭ་སྒྲེང་གི་བར་དུ་ཕེབས་པ་ལ་མཇལ། བདག་མེད་ལྷ་མོ་བཅོ་ལྔའི་དབང་ལ་སོགས་པ་དང༌། ལམ་འབྲས་དང་ནི་གུའི་སྐོར་མང་དུ་གསན་པའི་རྗེས་སུ་ཕག་མོ་གྲུ་པའི་ནང་ཟིངས་བྱུང་ནས། བར་སྐབས་སུ་འབུལ་བ་གནང་སྦྱིན་ཞལ་བརྡ་མང་དུ་མཛད། དེ་རྗེས་དབང་གྲགས་པ་རྒྱལ་མཚན་ལྷ་སར་ཕེབས་པའི་ཚེ་མཇལ་བ་ལ་ཕེབས། ཇོ་བོ་ལ་མར་ཁལ་སུམ་བརྒྱའི་དཀར་མེ། གསེར་སྲང་བཞིའི་ཞལ་གསེར།