[A:753]སྣམ་སྦྱར་དང་བླ་རེ་དང་མཎྜལ་ལ་སོགས་པའི་མཆོད་པ་རྒྱ་ཆེན་པོ་ཕུལ། དེ་རེས་ཡེར་པ་དང་འཚལ་ལ་སོགས་པར་བྱོན། སྟག་ལུང་ཐང་པའི་སྐུ་འདྲ་བཞེངས་ནས་སྒམ་པོར་སྤྱན་དྲངས། དྭག་པོའི་སྐུ་འདྲ་ལ་ན་བཟའ་གསེར་སྐོང༌། དེའི་སྐོང་རྒྱགས་ལ་སོགས་པ་བཙུགས། ཟངས་ལུང་དུའང་དཀར་མེ། ན་བཟའ། སྤྱན་སྔ་ཆོས་ཀྱི་སེང་གེ་བ་ལ་བེར་ཐུལ་ལ་སོགས་པའི་དགུ་ཚན་གྱི་འབུལ་བ། མང་ཇ་འགྱེད་དང་བཅས་པ་མཛད། སྔ་ཕྱིར་བྱང་རིས་དང་ཁམས་སྟོད་དུ་བྱོན་ནས་གཞན་གྱི་དུམས་མཛད་པ། འབུལ་བ་བཞེས་པ། ཆོས་གསུངས་པའི་རིམ་པ་ཡང་མང་དུ་ཡོད། སོག་པའི་འཇམ་དབོན་སེང་གེས་སྤྱན་དྲངས་པའི་རེས་ལ་ཞོར་ལ་སྐོང་དུ་ཕེབས་ནས། སྐོང་བའི་སྤྱན་སྔ་ནམ་མཁའ་དཔལ་རྩེགས་རྒྱལ་པོའི་བསྙེན་རྫོགས་ཀྱི་མཁན་པོ་མཛད། སྐབས་འདིར་རོང་པོ་ལ་འབྲི་ཁུང་པའི་ཛོང་ཇི་བསོད་ནམས་རིན་ཆེན་གྱིས་དམག་བྱས་ནས་སྟོད་མཐོན་པོར་དེད་པའི་བར་མཛད་པས་ཛོང་ཇིས་མ་ཉན། དེ་ནས་ཕག་མོ་གྲུར་ཕེབས་པ་ལ་བསམ་ཡས་སུ་ཕེབས་པའི་ཚེ་སྣེ་གདོང་ནས་སྔ་འདྲེན་བྱུང༌། རྟེན་གསུམ་ཐམས་ཅད་ལ་མཇལ། ཁྱད་པར་མཁན་པོའི་དབུ་ཐོད་ཐུགས་ཀར་གཟུང་ནས་ཡུན་རིང་བར་བཞུགས། དེ་རེས་མཆིམས་ཕུར་བྱོན་པས་ས་གཟར་སར་སྐུ་འཁོར་རྣམས་བགྲོད་དཀའ་བར་བྱུང་བ་ལ། རིན་པོ་ཆེ་ཉིད་ཞབས་ས་ལ་མ་རེག་པར་བཞུད་པ་མང་དུ་མཐོང༌། དེ་ནས་སྣེ་གདོང་དུ་ཕེབས་པའི་ཚེ་དབང་གྲགས་པ་རྒྱལ་མཚན་པས་ལྕང་གླིང་གྲུ་བཞི་ནས་བསུས། ཞག་བཞིར་