[A:755]མེན་ཞང་གི་ཡུལ་ན་མི་རེ་ཤི་བའི་རོ་དང་ལྷན་དུ་གསོན་པོ་དྲུག་བདུན་རེ་བསྲེག་པའི་སྲོལ་ཡོད་པ་ལ་གཅུང་བྱ་བྲལ་བས་གྲུབ་རྟགས་མང་དུ་བསྟན་ནས་ལས་དེའི་འཕྲོ་ཤོལ་དུ་བཅུག་པས་ལོ་སུམ་ཅུར་བཅད། དེ་རྗེས་རྗེ་རིན་པོ་ཆེ་གོང་མས་རི་པ་ཅིག་བཏང་བས་ལོ་བཅུ་གཉིས་སུ་ཕུལ། ད་ཡང་མི་ཅིག་གཏོང་བར་ཞུ་ཟེར་བྱུང་བས། བླ་མ་འཇམ་དཔལ་སེང་གེ་བཏང་ནས་མེན་ཞང་གི་རྒྱལ་པོ་ཐ་གུར་ལ་ཆོས་བཤད། རྒྱལ་པོ་ལ་སྐུ་འདྲ། དབུ་ཞྭ་ལ་སོགས་པའི་གནང་བྱིན་མང་པོ་དང༌། བློན་པོ་བི་མ་ལ་དང་ཐིར་མ་ལེ་གཉིས་ལའང་གནང་བྱིན་བསྐུར་ནས་གསུང་བསྒྲགས་པས། རྒྱལ་པོ་དེ་ན་རེ། སྤྱིར་མར་གུལ་གུ་རུ་ནས་མེན་ཞང་གི་སྐྱབས་གནས་སྟག་ལུང་པ་ཡིན་ཟེར་ནས། མེ་འཁོར་ཟེར་བ་དེ་ཕུལ། སྨན་ལུང་པ་ཟེར་བ་ཅིག་ལའང་གསེར་མང་དུ་བྱིན་ནས་མེ་འཁོར་བླུས། རྒྱལ་པོ་ཉུངས་ཏི་རཏྣས་ཀྱང་ཕུལ། དེ་ནས་སྐབས་ཞིག་ཏུ་རྒྱལ་ཁམས་ལ་ཆག་སྒོ་ཡོང་གསུང་ནས། ཐམས་ཅད་ལ་རིམ་གྲོ་གྱིས་གསུང་ཞིང༌། དབང་གྲགས་པ་རྒྱལ་མཚན་པ་ལའང་རིམ་གྲོ་ཆེན་པོ་བསྐུལ། ནང་སོ་ནས་ཀྱང་སྐུ་རིམ་མང་དུ་མཛད་ནའང༌། ས་གཡོས་ཆེན་མོ་བྱུང་ནས་གཙུག་ལག་ཁང་གི་ཤར་སྒོའི་ཁང་པ་ཞིག གླིང་གསེབ་ནས་སྤྱིལ་པོ་མང་དུ་འགྱེལ་བས་ཟླ་བ་ཕྱེད་དང་གཉིས་ཙམ་དུ་སྐུ་འབུམ་ལྟག་ཏུ་སྒར་མཛད་ནས་བཞུགས་པས། ཉེ་གནས་རྣམས་མེད་པའི་ཤུལ་དུ་རྣ་བ་ཁྱུ་ཆེན་པོ་ཅིག་གིས་སྐུ་མདུན་དུ་འོངས། ཁོང་རྣམས་ཕར་འདེད། ལ་ལས་ཕྱི་ནས་ན་བཟའ་ལ་ལྡག་བྱེད་པ་བྱུང༌།