[A:759]སྒྲུབ་པར་བྱེད་དོ་ཞེས་སྐུ་ཡལ་བའི་སློབ་མ་བཀྲ་ཤིས་གྲགས་པར་གྱུར་པའི་རྟེན་འབྲེལ་ལ་བརྟེན་ནས་དཔལ་མཁའ་སྤྱོད་པ་ཉིད་ཡིན་པའི་ངེས་པ་དུ་མ་ཡོད་དོ་ཞེས་ཟེར་རོ། །ཉི་ཤུ་རྩ་གཉིས་བཞེས་པ་ཤིང་ཕོ་འབྲུག་ལ་གདན་སར་ཕེབས། ལྕགས་ཕོ་ཁྱིའི་བར་དུ་ལོ་ངོ་བདུན་གདན་ས་མཛད། དེ་ནས་ཀུན་སྤངས་མཛད་དེ་ས་སྟོད་སྨད་ཐམས་ཅད་དུ་བྱོན་ནས་གཞན་དོན་བསྐྱངས། གཟིམས་ཁང་གཟིམས་སྤྱིལ་དུ་མཛད། མཐར་ཀོང་པོ་ནས་རིམ་པས་བརྒྱུད་དེ་མདོ་ཁམས་སུ་བྱོན་ནས་གདུལ་བྱ་དཔག་ཏུ་མེད་པ་བསྐྱངས། ཞེ་དྲུག་བཞེས་པ་ས་ཕོ་འབྲུག་ལ་མདོ་ཁམས་སུ་གཤེགས། ཆོས་རྗེ་བཀྲ་ཤིས་དཔལ་འོད་པ་ས་ཕོ་བྱི་བ་ལ་འཁྲུངས། ཉི་ཤུ་རྩ་གསུམ་བཞེས་པའི་ལྕགས་ཁྱི་ལ་གདན་སར་བྱོན། ལོ་ངོ་སུམ་ཅུ་རྩ་གཅིག་གི་བར་དུ་གདན་སར་བཞུགས། རང་ལོ་ལྔ་བཅུ་རྩ་གསུམ་བཞེས་པ་ལྕགས་འབྲུག་ལ་གཤེགས། ཆོས་ཀྱི་རྗེ་རིན་པོ་ཆེ་ངག་དབང་གྲགས་པ་དཔལ་བཟང་པོ་ནི། ས་ཕོ་ཁྱི་ལ་འཁྲུངས། སྐྱེས་བུ་དམ་པ་དུ་མ་ལ་བསྙེན་ནས་ཕ་རོལ་དུ་ཕྱིན་པ་དང་རྒྱུད་སྡེའི་གསན་པ་མང་དུ་མཛད། སྒྲུབ་བརྒྱུད་ཀྱི་གདམས་པ་མང་དུ་གསན། ཁྱད་པར་གཙང་ཕྱོགས་སུ་བྱོན་ནས་ཐམས་ཅད་མཁྱེན་པ་ཆོས་ཀྱི་རྒྱལ་པོ་ལ་སོགས་པའི་སྐྱེས་བུ་དམ་པ་མང་དུ་བསྟེན། དཔལ་མོ་ཆོས་སྡིངས་དང་ལ་ཕྱི་ལ་སོགས་པའི་གནས་མང་པོར་བཞུགས། སྙན་པའི་གྲགས་པས་ཕྱོགས་ཐམས་ཅད་དུ་ཁྱབ། དགུང་ལོ་བཞི་བཅུ་རྩ་བཞི་བཞེས་པ་ལྕགས་མོ་སྦྲུལ་ལ་གདན་སར་ཕེབས། ནང་གི་མཁྱེན་པ་དང་ཐུགས་དམ་