[A:760]ཐམས་ཅད་ལ་འགྲན་པའི་ཟླ་ནི་མེད། གཙུག་ལག་ཁང་ཆེན་པོའི་ཞབས་ཏོག་འཛིན་ཚུགས་ཐམས་ཅད་ཀྱང་ཁྱད་པར་དུ་འཕགས་པ་མཛད། དགེ་འདུན་གྱི་སྡེ་ཆེན་པོ་ཡང་དར་རྒྱས་སུ་གྱུར། དཔལ་སྟག་ལུང་ཐང་པའི་འཇིག་རྟེན་ཕྱོགས་ཀྱང་ཆོས་རྗེ་རིན་པོ་ཆེ་འདིའི་རིང་ཁོ་ན་དར་རྒྱས་ཆེ། མ་གི་ལྗང་གི་རྒྱལ་ཁམས་ཡན་ཆད་དུ་བྱ་བ་ཐམས་ཅད་བཞུགས་སྟན་མནན་པ་ཉིད་ཀྱིས་འགྲུབ། སྡེ་སྣོད་འཛིན་པ་ཐམས་ཅད་ཀྱང་ཞབས་དྲུང་དུ་ལྷགས་པ་ན་མཁྱེན་པའི་གཏིང་མི་དཔོགས་པར་ཞུམ། འཕྲལ་གྱི་མཛད་སྤྱོད་རྣམ་ཐར་ནི་བཟང༌། ཕྱི་ནང་ཐམས་ཅད་ནོར་ལོངས་སྤྱོད་ཀྱིས་ནི་གང༌། ལྷ་ཆེན་བཞེངས་པ་དང་སྦྱིན་གཏོང་རྒྱ་ཆེན་པོ་མཛད་པ་ལ་སོགས་པའི་མཛད་པ་རྣམས་ནི་བསམ་གྱིས་མི་ཁྱབ་པ་མཛད་ནས། དབོན་རིན་པོ་ཆེ་དགུང་ལོ་བཅུ་གསུམ་བཞེས་པ་ཅིག་གདན་སར་བཞུགས་སུ་བཅུག ཆོས་རྗེ་རིན་པོ་ཆེ་ཉིད་ཀུན་སྤངས་མཛད་ནས་ཞབས་བརྟན་པར་བཞུགས། ཆོས་ཀྱི་རྗེ་རིན་པོ་ཆེ་བཀྲ་ཤིས་དཔལ་བ་ནི་ལྕགས་མོ་སྦྲུལ་ལ་བྱེ་མར་འཁྲུངས་ནས་ཆོས་རྗེ་རིན་པོ་ཆེ་ལས་བཀའ་བརྒྱུད་ཀྱི་ཆོས་མ་ལུས་པར་གསན། དགུང་ལོ་བཅུ་གསུམ་པ་ལ་གདན་སར་ཕེབས་སོ། །དེ་ལ་སྤྱིར་བོད་གངས་ཅན་གྱི་རྒྱུད་འདིར། ལྷ་སའི་རྡོ་རིངས་ཀྱི་ཡི་གེ་ལས། འཕྲུལ་གྱི་ལྷ་བཙན་པོ་འོད་ལྡེ་སྤུ་རྒྱལ་ཡུལ་བྱུང་ས་དོང་ཚུན་ཆད་གདུང་མ་འགྱུར་བར་བོད་ཀྱི་རྒྱལ་པོ་ཆེན་པོ་ཆེན་པོ་མཛད་ཅེས་པ་ལྟར། རྗེ་གཉའ་ཁྲི་བཙན་པོ་འདོ་ལྡེ་ནས་རལ་པ་ཅན་ཡན་ཆོད་དུ་རྒྱལ་རབས་བཞི་བཅུ་རྩ་གཉིས་སུ་གདུང་མ་འགྱུར་