[A:761]བར་བོད་འབངས་ཐམས་ཅད་བསྐྱངས་པས། གདུང་རབས་རྒྱུན་རིང་ཞིང་ཤིན་དུ་བཀའ་དྲིན་ཆེ། ཆོས་ཀྱི་རྒྱལ་པོ་ཁྲི་སྲོང་ལྡེ་བཙན་གྱི་སྦྱིན་བདག་མཛད། མཁན་ཆེན་ཞི་བ་འཚོས་མཁན་པོ་མཛད་དེ། སད་མི་མི་བདུན་ལ་སོགས་པ་རབ་ཏུ་བྱུང་ནས་རབ་ཏུ་བྱུང་བ་ཐམས་ཅད་སྐྱོན་མེད་པའི་ཚུལ་ཁྲིམས་དང་ལྡན། ཐམས་ཅད་ཀྱང་མཁས་པའི་ཡོན་ཏན་གྱིས་སྡེ་སྣོད་གསུམ་ག་འཆད་པར་ནུས་པ་བྱུང་མོད་ཀྱི། དར་མས་བསྟན་པ་བསྣུབས་པས་རབ་ཏུ་བྱུང་བའི་བསྟན་པ་ལོ་དྲུག་ཅུ་རྩ་བདུན་ཙམ་ལས་མ་གནས། དེ་ནས་ལོ་བདུན་ཅུ་ལྷག་གི་བར་དུ་དབུས་གཙང་རྣམས་ཕན་ཚུན་འཐབ་རྩོད་ཀྱིས་གང་ཞིང་དགེ་འདུན་གྱི་སྡེ་མེད། དེ་ནས་བླ་ཆེན་པོའི་དྲིན་དང་དབུས་གཙང་མི་དྲུག་གམ་བཅུའི་དྲིན་གྱིས་དགེ་འདུན་གྱི་སྡེ་མང་དུ་འཕེལ་ནའང༌། སྡེ་ཕན་ཚུན་གྱི་རྩོད་པ་དང་དུས་ཕྱིས་ཧོར་དམག་གིས་རྭ་སྒྲེང་དུ་དགེ་འདུན་ལྔ་བརྒྱ་བཀྲོངས་པ་དང༌། རྒྱལ་དུ་མི་རྟ་ལྔ་བརྒྱ་ཙམ་བསད་པ་སོགས་མཐོ་དམན་མང་དུ་བྱུང༌། ཕྱིས་བླ་མ་འཕགས་པའི་སྐུ་དྲིན་གྱི་ས་སྐྱ་པས་དབུས་གཙང་ཁམས་གསུམ་གྱི་བདག་མཛད། འོན་ཀྱང་གདུང་བརྒྱུད་ནང་གི་ཆགས་སྡང་ལ་བརྟེན་ནས། བསྟན་པ་ལོ་བདུན་ཅུ་རྩ་ལྔ་ཙམ་ལས་མ་བྱུང༌། ཡང་རྗེ་དྭགས་པོའི་སློབ་མ་ཡང་སློབ་ལ་སོགས་པས་སོ་སོར་སྡེ་ཆེན་པོ་བཙུགས་པ་ལ། གདན་ས་ཐེལ་དུའང་འགྲོ་བའི་མགོན་པོ་གཤེགས་རྗེས་ནས་ཡུན་རིང་དུ་གདན་ས་བ་མེད་པས་མྱགས་པར་བྱུང༌། བོད་ཀྱི་ཡུལ་འདིར་གནས་གཅིག་ཏུ་དགེ་འདུན་གྱི་སྡེ་བཙུགས་པ་འབྲི་ཁུང་ཐེལ་ཆེ་