[A:792]དང་གནས་རྣམས་སུ་དགེ་འདུན་མང་དུ་འདུས་པ་རྣམས་ལ་སྒོམ་བཏབ་ནས་རི་ལ་འགྱེད་པ་ལན་མང་དུ་མཛད། ཆུ་མིག་དཀར་མོ་དང༌། ཤིང་སྐམ་དང༌། ལྕགས་སྤྱིལ་དང༌། དབུ་རི་ལ་སོགས་པའི་དགོན་པ་ཕྲན་རེ་མཛད་ནས་གཞན་དོན་བསྐྱངས། ཁྱད་པར་དབུ་རིར་ལོ་བདུན་བཞུགས་པས་ཚོགས་པའང་སྟོང་ལྷག་ཙམ་འདུས། ཕྱོགས་དེ་འཇིགས་པ་ཅན་གྱི་ས་ཡིན་པས་དེ་གཟུངས་པས་སྟོད་སྨད་གཞན་དུ་ཡང་འཇིགས་པ་དང་བྲལ། སྐྱེ་བོའི་ལམ་ཟན་འཛུགས་པ་ལ་སོགས་སྦྱིན་གཏོང་ཡང་རྒྱ་ཆེར་མཛད། འདི་ནས་བརྩམས་ནས་གདན་ས་ཡར་མར་དུ་འབུལ་བ་བཏང་བའང་གྲངས་ལས་འདས། ཕྱིས་མྱང་རོ་ལ་ལམ་བཏོད་ནས་ཇོ་མོ་ལྷ་རིར་ཡང་བཞུགས། དཔོན་སློབ་ཐམས་ཅད་ལ་ཧོར་དམག་གི་གནོད་པ་མ་བྱུང༌། དེ་ནས་སླར་གླང་གི་ལོ་ལ་དཀར་པོ་ཆོས་ལུང་བཏབ། ཚོགས་པ་མང་དུས་ཁྲི་ཚོ་ལྷག་པ་འཚོགས། ཐུགས་དམ་གསེར་གྱི་པོ་ཏི་མང་དུ་བཞེངས། དེ་ནས་ལྷོ་བྲག་མཁར་ཆུར་བྱོན། མཁར་ཆུའི་ལྷ་ཁང་ནང་འཁྲུག་གིས་ཞིག་པ་རྣམས་ཡང་དག་པར་གསོས་ཤིང་གསེར་གྱི་རྒྱལ་མཚན་བཙུགས། དེ་ནས་མོན་བུམ་ཐང་དུ་བྱོན་ནས། མོན་པ་དུད་འགྲོ་དང་འདྲ་བ་རྣམས་ཀྱང་བསྙེན་གནས་ལ་སོགས་པ་ལ་བཙུད། ཐར་པ་གླིང་གི་དགོན་པ་ཡང་བཏབ། དེ་ནས་སེང་གེ་རིར་ཕེབས་ནས། དེར་དགེ་སློང་བསླབ་པ་ཅུང་ཟད་ལྷོད་པ་རྣམས་ཀྱང་ཕྱིར་བཅོས་བྱེད་དུ་བཅུག་ནས་རབ་བྱུང་སྟོང་དང་ལྔ་བརྒྱ་ཙམ་ལ་བདེ་མཆོག་གི་དབང་མོ་ཆེ་རྒྱས་པ་ཞིག་ཀྱང་གནང༌། དེ་ནས་དུས་མཆོད་ཆེན་མོ་མཛད་ནས་ཟླ་བ་