[A:796]ཟེར་བས། འཇམ་དབྱངས་མགོན་པོར་གྲགས། ཆོས་རྗེ་ལོ་ལ་མྱང་སྟོད་སྨད་ཀྱིས་ཞུ་བ་ཕུལ་ནས། དེ་རྣམས་ཀྱི་སློབ་དཔོན་དུ་བསྐོས་པས། སྟོད་སྨད་ཀྱི་མཚམས་ཀུ་རུ་ལུང་དུ་དགོན་པ་བཏབ། བཞི་བཅུ་རྩ་གསུམ་པ་ལ་ལོ་རས་གཤེགས། བོ་དོང་ཕྱིན་ཆད་ནས་ལྷོ་བྲག་ཚུན་ཨེ་རོང་མན། དབུ་རི་ཚུན་ཆད་དུ་ཁྲོམ་མང་པོ་ཚོགས་པའི་སེམས་ཅན་གྱི་དོན་ལ་སེམས་བསྐྱེད་དང་དབང་དང་གདམས་ངག་དང་བསླབ་པ་སྦྱིན་པ་སོགས་གཞན་དོན་ཟད་མི་ཤེས་པ་བྱས། འདིས་མཛད་པའི་བསྟན་བཅོས་ཀྱང་སྔགས་ཀྱི་དབང་རྒྱུད་འགྲེལ་མན་ངག་གི་སྐོར་དང༌། མཚན་ཉིད་ཀྱི་གཞུང་བཤད་སྤྱི་བསྡུས་མང་པོ་དང༌། མི་དཔྱད་དང་རྟ་དཔྱད་སྨན་དཔྱད་ལ་སོགས་པའི་འཇིག་རྟེན་གྱི་བསྟན་བཅོས་མང་པོ་དང༌། ཐ་ན་རྒྱ་ཐབ་བཟོ་བ་ལ་སོགས་པའི་བཟོའི་བསྟན་བཅོས་མང་པོ་དང༌། རྒྱ་ནག་གི་རྩིས་ཀྱི་བསྟན་བཅོས་ལ་སོགས་པ་ཤིན་ཏུ་མང་བར་བརྩམས། རྒྱ་ནག་རི་བོ་རྩེ་ལྔར་ཡང་བྱོན་ནོ། །དེ་ལྟར་ལོ་རས་ནས་བརྒྱུད་པ་རྣམས་ལ་སྨད་འབྲུག་དང༌། རྒོད་ཚང་བ་ནས་བརྒྱུད་པ་རྣམས་ལ་སྟོད་འབྲུག་ཅེས་གྲགས་པས། འབྲུག་སྐོར་གཞན་ཐམས་ཅད་དེ་གཉིས་ཀྱི་གསེབ་ཏུ་ཐིམ་པ་ལྟ་བུར་གྱུར་རོ། །སྨད་འབྲུག་གི་སྐབས་སོ། །
རྒོད་ཚང་པ་བུ་ཆེན་དང་བཅས་པའི་སྐབས།
ཆོས་ཀྱི་རྗེ་རྒོད་ཚང་པ་མགོན་པོ་རྡོ་རྗེ་ནི། ལྷོ་བྲག་དུ་ལུ་ཆུང་གི་ཁྲར། ཡབ་ཆུ་ཆལ་མོན་གྲགས་དང་ཡུམ་ཟུག་མོ་དཔལ་རྒྱན་གཉིས་ཀྱི་སྲས་