[A:797]སུ་ས་མོ་བྱ་ལ་སྐུ་བལྟམས། གླིང་རས་གཤེགས་པའི་ཕྱི་ལོ་ཡིན། གཅེན་པོ་གཉིས་སྔ་བར་གྲོངས་པས་སྲེའུ་གསོ་བའི་སློབ་དཔོན་ཟུག་སྟོན་བྱ་བ་ལ་གཏད། མཚན་མགོན་པོ་དཔལ་དུ་བཏགས། སྐུ་ན་ཕྲ་བ་ནས་སྐུ་མཛེས་པས་ཀུན་གྱི་ཡིད་དུ་འོང༌། གསུང་སྙན་པས་གླུ་ལ་མཁས། ཐུགས་འགྲོགས་བདེ་བས་གཞོན་པའི་དུས་བྲོ་པའི་བ་ཤི་མཛད། བ་ཤི་དོན་གྲུབ་སེང་གེར་གྲགས། སྐབས་དེར་སློབ་དཔོན་ཝ་ཞྭ་ལ་ལམ་རིམ། སློབ་དཔོན་སྟོད་ལ་དབུ་མ། སློབ་དཔོན་ཡུ་པི་བ་ལ་སྤྱོད་འཇུག སློབ་དཔོན་ཞང་ལ་འགྲེལ་ཆུང་གསན་ཏེ། ཕལ་ཆེར་ཚར་རེས་མཁྱེན་པ་བྱུང༌། ལྷ་ས་ལན་གསུམ་སྐོར་དུ་བྱོན་ནས་ཆོས་འོང་བའི་སྨོན་ལམ་ཁོ་ན་བཏབ། ཡུལ་ན་ཆང་འཐུང་བྱེད་པ་ཅིག་གི་ཚེ་གཙང་ནས་གླུ་མཁན་བཞི་བྱུང་ནས་དེ་རྣམས་ཀྱིས། དགོན་པར་ལུང་གི་ཆོས་རྗེ་རྒྱ་རས་ལ། ཚེ་འདི་ཕྱི་གཉིས་ཀྱི་བདེ་ལེགས་ཡོད། ངེད་རང་གྲོགས་ཚན་ཟུང་ཅིག་དེ་རུ་གཤེགས་སམ། སྙིང་ནས་རང་དུ་ཆོས་ལ་གཤེགས། བྱ་བའི་གླུ་གསན་པས། མཚན་ཐོས་པ་ཙམ་གྱིས་དེ་ལས་ཆེ་རྒྱུ་མེད་པའི་མོས་གུས་ཤིག་སྐྱེས། ཡབ་ལ་ཞུས་པས་ཀྱང་གནང་ནས་ཟོང་དུམ་ཅིག་ཀྱང་ཐོགས་ཏེ། ཆོས་རྗེའི་སློབ་མ་ཟུག་སྒོམ་ཟེར་བ་ཅིག་ལ་ལམ་གྱི་འདྲེན་པ་ཞུས་ནས་ར་ལུང་དུ་རྟོལ། ཚོགས་ཆོས་གསུང་བ་དང་མཇལ་དེ་རང་དུ་རབ་ཏུ་བྱུང་མཚན་མགོན་པོ་རྡོ་རྗེར་བཏགས། མཇལ་རེས་ཀྱིས་ཆོས་རྗེ་ཞལ་འཛུམ་འོང་ཞིང་ཐུགས་ལ་བཏགས། དེར་གཏོར་དབང་ཅིག་གནང་ནས་ཁྲིད་ཞག་ཉི་ཤུ་རྩ་གཅིག་ཏུ་བསྐྱངས། མ་བདེ་བ་འགའ་རེ་བྱུང་བའང་ཁད་ཀྱིས་