[A:806]ལོ་ལྔ་བཅུ་རྩ་བདུན་པ་ལྕགས་མོ་སྦྲུལ་ལ་གཤེགས། མཻ་ཏྲི་བ་དང་ལྕོག་རོ་སྨྱོན་པའི་སྐྱེ་བ་ཡིན་པར་བཞེད། རྒོད་ཚང་བ་བུ་ཆེན་དང་བཅས་པའི་སྐབས་སོ།
སྟོད་འབྲུག་གི་སྐབས།
རྒྱལ་བ་རྒོད་ཚང་བའི་སློབ་མ་རྒྱལ་བ་ཡང་དགོན་པ་ཞེས་གྲགས་པ་དེ་ནི་འཁྲུངས་ཡུལ་ལ་སྟོད་ལྷོའི་དགོན་པ་ལྷ་གདོང་དུ་རྙིང་མ་བའི་གྲུབ་ཐོབ་ཟམ་མ་ཆད་པའི་བརྒྱུད་པ། ལོ་དྲུག་ཅུར་བར་མ་ཆད་དུ་བསྒོམས་པའི་གྲུབ་ཐོབ་དར་མ་ཞེས་བྱ་བ་ལ། གཅུང་པོ་ཇོ་བསམ་ཞེས་པ་སྔགས་རྒྱུད་ཀྱི་ཡོན་ཏན་ཆེན་པོ་མངའ་ཞིང་ཉིན་མཚན་དགེ་སྦྱོར་གྱིས་འདའ་བ་ཞིག་ཡོད་པ་དེ་དང༌། ཡུམ་རྣལ་འབྱོར་མ་ཆོས་མཐོང་ཞེས་བྱ་བ་གཉིས་ཀྱི་སྲས་སུ་ཆུ་མོ་བྱའི་ལོ་ལ་སྐུ་བལྟམས། གདུང་རུས་ནི་སྟོང་ཡིན། ཡུམ་གྱི་ལྷུམས་སུ་ཞུགས་པའི་ཚེ་ན་ཡུམ་ལ་ཉི་མ་གཉིས་ཤར་བ་ལ་སོགས་པའི་རྨི་ལྟས་ཁྱད་པར་ཅན་མང་པོ་དང༌། ཏིང་ངེ་འཛིན་རང་འཁྲུངས་སུ་སྐྱེ་བ་བྱུང༌། བལྟམས་ནས་རིང་པོ་མ་ལོན་པར་གསུང་འབྱོན་མཁྱེན་ཏེ། ཐོག་མར་སྐྱབས་སུ་མཆིའོ་བྱ་བའི་གསུང་བྱུང༌། ཀློག་དང་ཡི་གེའང་བསླབ་མ་དགོས། གསུང་འབྱོན་མཁྱེན་པ་ཉིད་ནས་ཡུམ་གྱིས་ཐོག་དྲངས་ཉེ་འཁོར་ན་ཡོད་པ་རྣམས་དམ་པའི་ཆོས་འབའ་ཞིག་ལ་བསྐུལ་བའི་གསུང་འབྱོན་ཞིང༌། སྐྱེས་