[A:818]ཆང་དང་རྩ་བ་བཞི་བསྲུང་བའི་དགེ་བསྙེན་མཛད་པས། ཆོས་རྗེའི་ཞལ་ནས། སློབ་དཔོན་ཇོ་སྲས། ད་ནི་བཙུན་པ་དང་ཁྱད་མེད་སྡོམ་པ་ཐུབ་པ་དཀའ་འོ། །འོ་ན་ཡང་ཁོང་གིས་ཐུབ་ཐུབ། ཁོང་སྐྱེ་བ་སྔ་མའང་བཙུན་པ་ཅིག་ཡིན་ཨང༌། རྒན་པོ་ཁོ་དེ་ཞེས་ཞིག་པོ་བྱང་དཔལ་ལ་གསུང༌། ཆོས་རྗེས་ཀ་ར་སྙིམ་པ་ཕྱུར་བ་གང་གནས་བྱུང་བ་རྫོགས་པར་གསོལ་བས་རྟེན་འབྲེལ་ཡང་འགྲིག ཆོས་རྗེའི་ཞལ་ནས། ཁྱེད་ལན་ཅིག་ངའི་རྩར་འོང་དགོས། ངས་ཕྱག་རྒྱ་ཆེན་པོ་བསྟན་པས་གྲོལ་བ་ལ་ཚེགས་མེད་གསུང༌། དེ་ནས་གོ་ལུང་བ་མདོ་སྡེ་དཔལ་ལ་འགྲེལ་ཆུང་གསན། འདུལ་བའི་སྐོར་རྣམས་གཟིགས་པས་བག་ཆགས་འཐུག་པར་འདུག་ཅིང༌། ཁྱད་པར་ལས་བརྒྱ་རྩ་གཅིག་པ་གཟིགས་པ་ཙམ་གྱིས་ཐུགས་ལ་བྱུང༌། དགུང་ལོ་ཉི་ཤུ་ལོན་པའི་ཚེ་བོ་དོང་རིན་རྩེས་མཁན་པོ། ཞང་བསམ་གླིང་པས་སློབ་དཔོན། སློབ་དཔོན་བསོད་ནམས་འོད་ཟེར་གྱིས་གསང་སྟེ་མཛད་ནས་ཅིག་ཆར་བསྙེན་པར་རྫོགས། མཚན་རིན་ཆེན་དཔལ་དུ་གསོལ། དེ་ནས་ལོ་བཅུ་གཉིས་སུ་སྟན་གཅིག་པའི་བརྟུལ་ཞུགས་གཟུང་ཞིང་ཤ་ཡང་མི་གསོལ། ཆོས་རྗེ་རིན་རྩེ་ལ་དུས་འཁོར་འབྲོ་ལུགས་ལེགས་པར་ཞུས། གོ་ལུང་པ་ལ་དུས་འཁོར་ཆག་ལུགས་ལེགས་པར་བསླབས། རྩིས་ལ་སྦྱངས་ཤིང་མཁས་པར་མཁྱེན། ཁོང་གི་གསུང་གིས་དུས་འཁོར་བ་སངས་རྒྱས་རྡོ་རྗེ་ཙ་མི་ལུགས་ལ་མཁས་པས་ཉོན་གསུང་ནས་ཟླ་བ་བཅུ་གཅིག་ཏུ་ཕྲན་དང་བཅས་པ་གསན། དེར་ཁོང་ཆོས་བཅག་ནས་སེར་ཆགས་ལ་བྱོན་པ་ལ་ཐུགས་ཅུང་ཟད་སྐྱོ་ནས་དམ་པ་ལ་