[A:817]བསོད་ནམས་གྲགས། དེའི་སྲས་རྒྱུས་ནག་བདེ་གཤེགས། དེའི་སྲས་རྒྱལ་ཚ་བསོད་ནམས་འཕགས། དེའི་སྲས་དབོན་ཇོ་འཕན་དང་བཙུན་མོ་དུག་གེ་མེ་ལ་སྲ་་ས་བཞི་དང་ལྕམ་གསུམ་བྱུང་བའི་གྲུབ་ཆེན་པ་ནི་ཆུང་ལྷག་ཡིན། ལྕགས་ཕོ་སྟག་གི་ལོ་ལ་སྐུ་འཁྲུངས། མཚན་སེང་གེ་དཔལ་དུ་གསོལ། བྱིས་པའི་དུས་ནས་ཏིང་ངེ་འཛིན་རང་འཁྲུངས་སུ་བྱུང་བས། དགོངས་པ་ལ་དང་པོར་ཐོས་པ་བྱས། དེ་ནས་སྒོམ་པ་བྱ་སྟེ་ད་ལྟའི་སེམས་འདི་དང་ཁྱད་ཅི་འདུག་ལྟ་དགོས་དགོངས་པ་བྱུང༌། ཡབ་ཀྱིས་བཙུན་མོ་གཅིག་ལེན་ཟེར་བས་ཁུ་བོའི་དྲུང་དུ་བྱོན། ང་ཆོས་རང་བྱེད་འདོད་པ་ཡིན་ཏེ། ཕས་ཆུང་མ་ལེན་ཟེར་བྱས་ནས་མང་དུ་བཤུམས་པས། ཁུ་བོས་དབུགས་ཕྱུང༌། དེར་ལོ་བདུན་ནས་བཅུ་དྲུག་གི་བར་དུ། མ་ཕུར། བདེ་དགྱེས། ཕྱག་རྡོར། ཡོ་ག་ལ་སོགས་པའི་རྒྱུད་འགྲེལ་སྒྲུབ་ཐབས་ཕྱག་ལེན་དང་བཅས་པ་གསན་ཞིང་མཁས་པར་བསླབས། དེ་ནས་དགུང་ལོ་བཅུ་དྲུག་པ་ལ་བོ་དོང་ཨོར་བྱོན། ཆོས་རྗེ་རིན་ཆེན་རྩེ་མོ་ལ་མངོན་པ་གོང་འོག ཚད་མ་རྣམ་ངེས། ཤེས་རབ་འགྲེལ་ཆུང་གསན་ཞིང༌། འཆད་རྩོས་རྩོམ་གསུམ་ལ་འགྲན་ཟླ་མེད་པའི་གྲགས་པ་ཐོབ། དེ་ནས་ཆོས་རྗེ་རྒོད་ཚང་པ་བདེ་ཆེན་སྟེངས་ནས་སྤྱང་ལུང་དུ་འབྱོན་པའི་ལམ་གོ་ལུང་ཕུ་རུ་གདན་ཕེབས་པ་ལ། ཆོས་རྗེ་རྒོད་ཚང་པས་དེ་རིང་ལས་ཅན་ཞིག་དང་ཕྲད་འོང་གསུང་བའི་ལུང་བསྟན་མཛད་པ་བཞིན། མཇལ་མ་ཐག་ཚད་ལས་འདས་པའི་དད་པ་སྐྱེས། སྦུད་ཏྲར་ཕེབས་དུས་ཟངས་ཤིག་དང་བུར་ལྟང་ཅིག་ལ་ཕྱག་རྟེན་བྱས།