[A:829]དང་ཀུན་ལྡན་གྱིས་མཁན་སློབ་མཛད་ནས་དགེ་ཚུལ་མཛད། མཚན་ཚུལ་ཁྲིམས་ཤེས་རབ་ཏུ་བཏགས། ལོ་བཅུ་གཅིག་པ་ལ་དགེ་བཤེས་གཙང་གི་སར་རྣམ་ངེས་གསན་དུ་བྱོན། །བཅུ་གཉིས་པ་ལ་ས་སྐྱར་རྩེ་མོ་གཤེགས་པའི་ཆོས་འཁོར་ལ་བྱོན། ཆོས་འཁོར་དེ་ལ་ཞུ་སྟོན་ཧྲལ་མོ་ཡང་བྱོན། འཇད་པ་གཞོན་བྱང་ཡང་བྱོན། དེ་ནས་ལོ་བཅུ་དྲུག་ལོན་གྱི་བར་དུ་གཙང་དཀར་ལ་གསན་པ་མང་དུ་མཛད། ཆོས་འཁོར་བྱུང་བ་རྣམས་སུ་རྩོད་པས་ཀྱང་གཞན་ཕམ་པར་བྱས། སློབ་དཔོན་གཙང་དཀར་བ་ལ་འབུལ་བ་ཞབས་ཏོག་ཀྱང་ཆེར་བསྒྲུབས། བཅུ་བདུན་ལ་སྣུར་པའི་ཐུགས་སྲས་རྩེ་སྟོན་ཀུན་བཟངས་ལོ་བརྒྱད་ཅུ་རྩ་བརྒྱད་ལོན་པ་ཅིག་ཁྲོ་ཕུར་སྤྱན་དྲངས་ནས་རྡོར་དབྱིངས་ལ་སོགས་པའི་དཀྱིལ་འཁོར་ལྔ་བརྒྱ་ལྷག་ཅིག་གི་ལག་ལེན་ཀྱང་བསླབས། ཕྱིས་འབྱོན་ཁར་བྱ་རྒོད་གཤོངས་ཀྱི་རྣམ་སྲས་དེས་རྩེ་སྟོན་ཀུན་བཟང་ལ་རྨི་ལམ་དུ་ང་ཇོ་སྲས་འདི་ལ་ཕོག་བྱ་བ་བྱུང་བས་རྣམ་སྲས་ཀྱི་རྗེས་གནང་ཡང་གསན། ལོ་བཅུ་དགུ་པ་ལ་འབྲིང་མཚམས་ཞང་གི་དབོན་པོ་ཞང་དགེ་བ་ཟེར་བའི་ལོ་ཙཱ་མཁས་པ་ཅིག་ཡོད་པ་དེ་ལ་ལོ་ཙཱ་བ་བསླབས་པས་ཕུལ་དུ་བྱུང་བར་མཁྱེན། ལོ་དེ་ལ་རིན་པོ་ཆེ་རྒྱལ་ཚས་མཁན་པོ་དང༌། སློབ་དཔོན་གཙང་དཀར་གྱིས་ལས་སློབ། ཀུན་ལྡན་རས་པས་གསང་སྟེ་བ་མཛད་ནས་བསྙེན་པར་རྫོགས། དེ་ནས་གཙང་ནག་ལ་འདུལ་བ་སློབ་པའི་ཕྱིར་ལོ་རིལ་པོ་གཉིས་སུ་བསྟེན་ནས་མཁས་པར་བསླབས། ལོ་ཉེར་གཅིག་པ་ལ་ཀུན་ལྡན་ལ་ལོ་རོ་རས་པའི་ཐབས་ལམ་དང་ཐུན་འཇོག་ལ་སོགས་