[A:833]ལ་འཁྲུངས། དཔལ་ཕག་མོ་གྲུ་པའི་བཅུ་བཞི་པ་ཡིན། ཆུང་ངུ་ནས་ཆོས་ཀྱི་བག་ཆགས་ཁོ་ན་བྱུང་ཞིང༌། ཁྱད་པར་ལོ་ལྔ་དྲུག་ལོན་པའི་ཚེ་ཡབ་ཀྱིས་དམྱལ་བའི་སྡུག་བསྔལ་བཤད་པས། དགོངས་ཤིང་བྲེད་ནས་ཡབ་ལ་ཅི་ཕན་དྲིས་པས། ལྷ་ཕྱག་དང་སྐོར་བས་ཕན་ཟེར་ནས་ཉིན་མཚན་དུ་མེས་པོའི་བཀའ་པོད་ཀྱི་དྲུང་དུ་ཕྱག་དང་སྐོར་བ་མཛད། ལོ་བདུན་པ་ལ་ཡུམ་དང་གཅེན་པོས་ཀློག་ཡིག་ལེགས་པར་བསླབས། དགུ་པ་ལ་བྱེའུ་སྟོན་པ་ལ་སྡུད་པ་དང་མངོན་རྟོགས་རྒྱན་ལ་སོགས་གསན། བཅུ་པ་ལ་སློབ་དཔོན་གཤེན་ལ་མཚན་བརྗོད་ལ་སོགས་པ་གསན། བཅུ་གཅིག་པ་ལ་རྔོག་མདོ་སྡེ་ལ་དགྱེས་རྡོར་དང༌། གུར་དང༌། མ་ཧཱ་མཱ་ཡཱ་ལ་སོགས་གསན། འཇམ་དཔལ་གསང་ལྡན་ལ་བཤད་པའང་མཛད། སམ་བུ་ལོ་ཙཱ་བ་ལ་མངོན་པ་དང་ཚད་མ་ལ་སོགས་པ་མང་དུ་གསན། བཅོ་བརྒྱད་པ་ལ་ཕ་ཚན་གྱི་བརྙས་པ་བྱུང་བས་སྒྲུབ་མཐུ་ལོ་གསུམ་མཛད་ནས་ཚར་གཅད། དེ་རྟིང་ཁམས་སུ་བྱོན་ནས་ཉི་ཤུ་རྩ་གསུམ་པ་ལ་སློབ་དཔོན་བློ་སྟོན་བྱ་བ་ལ་བརྟེན་ཁྲིམས་ལྔའི་སྡོམ་པ་བླངས། དེར་ཡང་མངོན་སྤྱོད་ཀྱི་ཕྲིན་ལས་ལོ་གཅིག་མཛད། ཉི་ཤུ་རྩ་བཞི་པ་ལས་འཕྲོ་སད་དེ། མནལ་ལམ་དུ་སྣ་ནས་རྣག་ཁྲག་མང་པོ་ཟག་པའི་མཐར་སྦྲུལ་འདྲ་བའི་སེམས་ཅན་རིང་པོ་ཞིག་མཐོན་ནས་ནུབ་ཕྱོགས་སུ་རྒྱང་རིང་པོར་སོང༌། དེར་ཁྱོད་དང་ཡུན་རིངས་ཤིག་འགྲོགས་ཏེ་ད་ནི་མི་འཕྲད་སྙམ་པ་བྱུང༌། གསེར་གཡུས་མདོར་གྲོགས་པོ་ཅིག་ལ་མཛོ་རིན་མ་ཁུགས་པས་རྐྱེན་བྱས་ནས་འཁོར་བ་ལ་ཡིད་འབྱུང་ཡང་དག་