[A:834]པར་སྐྱེས་ནས་མཐུ་མཛད་འཕྲོའི་རྟེན་གཏོར་བརྡབས། ཁྲག་གི་རྫ་མ་ཕོ། སློབ་མས་སློབ་དཔོན་སྨྱོ་འདུག་པ་དེ་ཙུག་མ་བྱེད་ཟེར་བ་ཡང་བྱུང༌། དེ་ནས་སྡིག་པ་མ་བྱས་ཙམ་མ་གཏོགས་ཆེར་མ་བྱུང༌། །ཉི་ཤུ་རྩ་དྲུག་པ་ལ་དཀོན་བརྩེགས་གཟིགས་པས་དད་པ་ཆེན་པོ་འཁྲུངས་ཏེ། མཁན་པོར་དགེ་བའི་བཤེས་གཉེན་མཁར་སྒོ་བ་དང༌། སློབ་དཔོན་གྲབ་མཁར་བ། གསང་སྟོན་གཟུང་ལྗང་མདོ་བ་རྣམས་ལས་བསྙེན་པར་རྫོགས་མཚན་བརྩོན་འགྲུས་གྲགས་སུ་བཏགས། ལོ་གཅིག་ཏུ་ཙོག་པུ་དང་སྟན་ཅིག་མཛད། ན་བཟའ་བརྗེ་བའི་དུས་མ་གཏོགས་སྐུ་རགས་ཀྱང་མ་བཀྲོལ་བར་བྱང་ཆུབ་ལྟུང་བཤགས་ལ་པོད་སྐོར་མཛད་ཅིང་བཞུགས་ཙ་ན། དཔལ་རྒྭ་ལོ་སོགས་ཏུ་ཕེབས་པའི་སྤྱན་སྔར་བྱོན། ཞལ་མཐོང་བ་ཙམ་གྱིས་དད་པ་ཡང་དག་པ་སྐྱེས། སྒོམ་ལུང་ཞུས་པས་ཐོག་མར་ཧེ་རུ་ཀའི་གོ་འཕང་ཚེ་འདི་ཉིད་ལ་ཐོབ་པར་བྱ་སྙམ་པ་གྱིས་གསུང་པས། གསང་སྔགས་ཀྱི་གདམས་པ་ཡང་དག་པ་ཅིག་གནང་བ་འདུག་སྙམ་དུ་དགོངས་ཏེ། ཕྱིས་དེ་ཁོ་ན་བཞིན་དུ་བྱུང༌། །རྡུལ་ཚོན་དང་རས་བྲིས་ཏིང་ངེ་འཛིན་གྱི་དབང་གནང་ཞིང་སྦྱོར་དྲུག་ལ་སོགས་པ་རླུང་རྩོལ་མང་དུ་གནང་ནས་བསྒོམས་པས་མགོ་ན་བ་ལ་སོགས་བྱུང་བ་ལ། འབྱུང་བ་འཁྲུགས་པའི་སྐྱོན་ཡིན་པས་ཤ་རུས་ལ་ལོངས་སྤྱོད་པ་གྱིས། ནང་ཕན་ནས་མི་ཟ་བ་ཡིན་མོད་གསུང༌། དེ་ནས་རང་ཡུལ་གྱི་དབེན་པ་རྣམས་སུ་བསྒོམས་པས་རྟག་ཏུ་འདྲེས་གཙེར། ཐིག་ལེའི་གེགས་ཤིག་བྱུང་བ། རྗེ་བཙུན་རྒྭ་ལོ་ཐག་རིང་བས་རྗེ་བཙུན་ཡེར་བ་པ་ལ་དང་པོར་ཡི་གེ་བཏང་