[A:836]ཡང་འཕེལ་འགྲིབ་བག་རེ་བྱུང་བས་ཐབས་ལམ་ལ་འབད་ཅིང་བསྒོམས་པས་བོགས་ཆེན་པོ་ཐོན། སྐབས་ཤིག་ཏུ་བླ་མ་འོལ་ཁ་བ་དང་མཇལ། གདམས་པ་ཞུས་པས་བྱམས་པ་དང་སྙིང་རྗེ་བྱང་ཆུབ་ཀྱི་སེམས་ལ་བོགས་ཐོན་ཞིང་གྲུབ་པ་བརྙེས་ནས་གཙུག་ལག་ཁང་དང་ལྷ་ཆེན་བཞེངས། དེའི་ཆ་རྐྱེན་ཡང་ལ་ལ་ལ་བླངས། ལ་ལས་ཕུལ། ལ་ལ་ལ་བཙན་ཕྲོགས་ལྟ་བུ་མཛད། བཀའ་ལས་འགལ་བ་རྣམས་ལ་དམག་ཡང་དང་ཡང་དུ་བསྐུལ་ནས་འཐབས། གྲུབ་པའི་སྤྱོད་པ་སྣ་ཚོགས་པ་མཛད་དེ། གཞན་གྱི་བློར་ཤོང་བ་དཀའ་མོད་ཀྱི། ཞང་ཉིད་ཀྱིས་ཇོ་བོ་ལྷ་བཙུན་ལ་གདམས་པ་ལས། ཁོ་བོས་ནི་འཇིག་རྟེན་བློས་བཏང༌། འཇིག་རྟེན་དང་འབྲེལ་ཐག་རྦད་ཀྱིས་ཆོད་ནས་སྐྱེ་མེད་ནམ་མཁའི་ངང་དུ་ཆམ་གྱིས་ཐལ་ནས་དགུང་ལོ་མང་པོ་ལོན་པ་ལགས་སོ། ཁོ་བོའི་ཕྱིའི་བྱེད་སྤྱོད་འདི་རྣམས་ཀྱི་རྗེས་སུ་དཔགས་ནས། སློབ་མ་སྙིང་རག་མ་རྣམས་མ་གཏོགས་པ་གཞན་མང་པོ་ཅིག་གི་བློར་མ་ཤོང་བར་བདོག མི་ཆོས་ཀྱི་ཡུལ་དུ་གཞི་ཕབ་ནས། ལུགས་མ་དང་གནས་གཞི་དང་རྒྱལ་ཁྲིམས་དང་ལམ་རྒྱ་དང་རྐུ་སྐྱབས་དང་འཁྲུག་པ་ལ་སོགས་པ་འཇིག་རྟེན་འདི་བའི་བྱེད་སྤྱོད་ཁོ་ན་འདྲ་བ་ཤ་སྟག་ཏུ་སྣང་སྟེ། འཇིག་རྟེན་འདི་དང་འབྲེལ་བ་གཏིང་ནས་བདོག་ན་འགུམ་པ་ལགས་སོ། །ཞེས་གསུངས་པ་དེ་ཁོ་ན་སྟེ། གཞན་གྱི་དོན་རླབས་པོ་ཆེ་དེ་ལྟ་བུ་མཛད་པས་བདུན་ཅུ་རྩ་གཅིག་པ་ཆུ་མོ་གླང་གི་ལོ་ལ་ཞི་བར་གཤེགས་སོ།
དེའི་བུ་སློབ་གནས་ལས་མིང་དུ་བཏགས་པ་ལྷ་རི་བ་ནམ་མཁའ་འོད།