[A:836]yang 'phel 'grib bag re byung bas thabs lam la 'bad cing bsgoms pas bogs chen po thon/ skabs shig tu bla ma 'ol kha ba dang mjal/ gdams pa zhus pas byams pa dang snying rje byang chub kyi sems la bogs thon zhing grub pa brnyes nas gtsug lag khang dang lha chen bzhengs/ de'i cha rkyen yang la la la blangs/ la las phul/ la la la btsan phrogs lta bu mdzad/ bka' las 'gal ba rnams la dmag yang dang yang du bskul nas 'thabs/ grub pa'i spyod pa sna tshogs pa mdzad de/ gzhan gyi blor shong ba dka' mod kyi/ zhang nyid kyis jo bo lha btsun la gdams pa las/ kho bos ni 'jig rten blos btang / 'jig rten dang 'brel thag rbad kyis chod nas skye med nam mkha'i ngang du cham gyis thal nas dgung lo mang po lon pa lags so/ kho bo'i phyi'i byed spyod 'di rnams kyi rjes su dpags nas/ slob ma snying rag ma rnams ma gtogs pa gzhan mang po cig gi blor ma shong bar bdog mi chos kyi yul du gzhi phab nas/ lugs ma dang gnas gzhi dang rgyal khrims dang lam rgya dang rku skyabs dang 'khrug pa la sogs pa 'jig rten 'di ba'i byed spyod kho na 'dra ba sha stag tu snang ste/ 'jig rten 'di dang 'brel ba gting nas bdog na 'gum pa lags so/ /zhes gsungs pa de kho na ste/ gzhan gyi don rlabs po che de lta bu mdzad pas bdun cu rtsa gcig pa chu mo glang gi lo la zhi bar gshegs so/
de'i bu slob gnas las ming du btags pa lha ri ba nam mkha' 'od/