[A:843]དགུང་ལོ་ཉེར་གཉིས་པ་ལ་ཏི་སེར་བྱོན། དེར་ལོ་བཞི། ཆུ་བར་དུ་སྔ་རྟིང་གཉིས་ལ་ལོ་བཅོ་བརྒྱད་དེ་ལོ་ཉི་ཤུ་རྩ་གཉིས་རྩེ་གཅིག་ཏུ་བསྒོམས་པས་ཕྱག་རྒྱ་ཆེན་པོའི་རྟོགས་པ་འཁྲུངས། མངོན་པར་མཁྱེན་པའང་མངའ། དེ་ཁོ་ན་ཉིད་གཟིགས་ཤིང་ཐུགས་རབ་རྣོ་བས་མཁས་པ་ཆེན་པོར་རློམ་པ་རྣམས་ཀྱི་སྤོབས་པ་ཡང་འཕྲོག་ནུས་པས། ཀརྨ་པ་དཀོན་གཞོན་ཆུ་བར་དུ་བྱོན་ཆོས་ཀྱི་གཏམ་མཛད་པས་ཁོང་ཕམ་པར་མཛད་དེ། ཁོང་གི་ཐང་ཞུ་ཅིག་འདུག་པ་དབུལ་གསོལ་ནས། ཁྱེད་སྟོན་པ་མིན་ང་སྟོན་པ་ཡིན་གསུང་པ་མཛད། མཁས་པ་སུ་དང་ཕྲད་ཀྱང་ཉམ་མི་ང༌། སྐུ་ཚེ་རིལ་པོར་བྱ་བྲལ་བའི་བརྟུལ་ཞུགས་གཟུང་ནས། གོང་མ་ཆེན་པོ་མི་དབང་གྲགས་པ་རྒྱལ་མཚན་ལ་སོགས་པ་ཆེ་དགུའི་བླ་མར་གྱུར་ཀྱང༌། དགོན་པར་ཕེབས་མ་ཐག་གཅིག་པུར་བཞུགས་ཤིང་ཐབ་ཁའང་རང་གིས་མཛད། ནང་དུ་ན་བཟའ་འང་ཅི་བྱུང་གསོལ། བརྩོན་འགྲུས་དང་སྒོམ་སྲན་ཆེ་བས་ཚོས་ཕོ་ཆེ་གཉིས་ཀྱང་རྗེ་བཙུན་མི་ལའི་དང་འདྲ་བར་ཡོད་ཟེར། དེ་ལ་སློབ་མ་མང་དུ་ཡོད་ཀྱང་གཙོ་བོ་ནི། སྤྱན་སྔ་རིན་པོ་ཆེ་བསོད་ནམས་རྒྱལ་མཚན་དཔལ་བཟང་པོའི་ཞལ་སྔ་ནས་ཡིན་ཏེ། བླ་ཆེན་པ་ལ་སེམས་ཁྲིད་གསན་ནས་དེའི་ཁྲིད་ཡིག་ཀྱང་མཛད། གདུལ་བྱ་ཡང་གྲངས་མེད་པ་ལ་ཁྲིད་བཏབ་བོ། དེ་གཉིས་ཀའི་སློབ་མ་ནི་སྐྱེས་བུ་དམ་པ་ནམ་མཁའ་བསོད་ནམས་པ་ཡིན་ཏེ། དེས་བླ་མ་དམ་པ་དེ་གཉིས་ལས་གདམས་པ་མནོས་ནས་ཉམས་སུ་བླངས་ཤིང༌། རེ་ཤིག་རྐྱང་གི་ཕུར་གཅོད་ལ་བྱོན་ནས་ཤིང་སྡོང་གཉན་པར་བྱེད་པ་ཅིག་གི་སར་བཞུགས་