[A:842]ཁྱེད་ལ་གཏེར་ཆོས་ཟབ་མོས་ཡོད་འདུག་པ་དེ་ང་ཞུ་བ་ཡིན་ཟེར། དེ་འདྲ་སུ་ཟེར་བྱས་པས། ཁྭ་ཏ་ཅིག་ཟེར་བ་ཡིན་ཟེར། ཁོ་དགེ་སྦྱོར་བཟང་པོ་ཡོད་པས་གཞན་རྣམས་མ་བྱིན་པར་རོ་གཅིག་ཡན་ཆད་ཀྱི་བོགས་འདོན་བྱིན་པས་རྟོགས་པ་ཁྱད་པར་ཅན་རྒྱུད་ལ་སྐྱེས། དེ་ནས་རས་པ་བརྒྱད་བརྒྱ་ལའང་ཁྲིད་བཏབ། ཕྱིས་ལྷོ་གཉལ་ལ་སོགས་པའི་ཡུལ་མང་པོར་འགྲོ་བའི་དོན་མཛད། མཐར་གྲང་མོའི་རྫ་ཆུ་དར་མོར་ཡུན་རིང་དུ་བཞུགས་སོ། །དེ་ལ་སློབ་མ་ནི་ཤིན་ཏུ་མང་མོད་ཀྱི། གདམས་ངག་གི་བརྒྱུད་པ་འཛིན་པ་ནི། བླ་མ་འཁྲུལ་ཞིག་སྣའུ་བ། ཙ་རི་རས་པ། བྱེ་མ་རས་པ། དོམ་ཚང་རས་པ། སྒྲོད་ལུང་པ། སྟག་ཚང་རས་པ་སོགས་ཏེ། དེ་རྣམས་ལས་སྣའུ་བྱ་བྲལ་བ་ནི། འཁྲུངས་ཡུལ་ཟུར་མཁར། ཟ་ལུང་དུ་རབ་ཏུ་བྱུང༌། མཚན་རྡོ་རྗེ་མཛེས་སུ་གསོལ། འགྲོ་མགོན་དུང་མཚོ་བ་དང་ཀཱ་ལ་དུང་མཚོར་མཇལ་ནས་ཤོག་དྲིལ་རྣམས་ཚང་བར་གསུངས། བླ་མའི་ཞབས་ཏོག་ཀྱང་ལེགས་པར་མཛད། སྣའུ་གངས་རིར་ཐུགས་དམ་མཛད་པས་སྣམ་དུ་བྱ་བྲལ་བར་གྲགས། གཞན་ཡང་རི་ཁྲོད་མང་པོར་བཞུགས། ཕྱག་རྒྱ་ཆེན་པོའི་དངོས་གྲུབ་བརྙེས། སྐུ་འདས་དུས་རིང་བསྲེལ་དཔག་ཏུ་མེད་པ་བྱོན། དེས་བླ་མ་ཆེན་པོ་རིན་ཆེན་གཞོན་ནུ་རྗེས་སུ་གཟུང་བ་ཡིན་ཏེ། གདུང་རུས་མཁའ་རེ། འཕྱོས་ཁ་སྒང་གི་འབྲོག་ཏུ་ཚེ་བཞི་རྙིང་མ་བའི་ཞེ་གཅིག་པ་ཆུ་མོ་བྱ་ལ་འཁྲུངས། ཚེས་བཞི་རྙིང་མ་བའི་ཞབས་ལ་གཏུགས་ནས་དགུང་ལོ་དགུ་ལ་རབ་ཏུ་བྱུང༌། །ཆོས་ཁྲིད་ཀྱང་རྫོགས་པར་གསན།