[A:845]ལའང་ཆོས་མང་དུ་ཞུས། མཚལ་དུ་མཁན་པོས་བཀའ་ནན་མཛད་པས་མཁར་དགོན་གྱི་གདན་སར་བཞུགས་པའི་ཚེ། ནུབ་གཅིག་རྨང་ལམ་དུ་ཤིན་ཏུ་མཛེས་པའི་བུད་མེད་ལྔ་བྱུང༌། འདིར་ཤོག་ཟེར་ཏེ་གཙུག་ལག་ཁང་ཆེན་པོ་ཅིག་ཏུ་ཁྲིད། སྒོ་ཕྱེ་བའི་ནང་ཤིན་ཏུ་ཡངས་པ་ན་ཆོས་རྩིག་མང་པོ་འདུག སྒོ་གསར་པ་སྐྱ་ཁྲིག་གེ་བའང་མང་པོ་འདུག་པས། རེ་རེ་ནས་ཕྱེས་པས་དེ་རྣམས་ཀྱང་པོ་ཏི་དུ་མས་ཁེངས་འདུག སྡེ་མིག་གི་ཕོན་ཆེན་པོ་ཅིག་ཁོང་ལ་གཏད་ནས། འདི་རྣམས་ཀྱི་གཉེར་གྱིས་དང༌། བསྟན་པའི་ཞབས་ཏོག་ཆེ་བ་ཡིན་ཟེར་བ་རྨིས། སང་ནང་བར་བླ་མ་སྣའུ་པས་འབྲོང་ཕུར་ལོ་དགུ་རི་མི་འབབས་མཛད་བཞུགས་པ་ནས་བྱོན་ཏེ་མཇལ། ཆོས་ཀྱི་གསུང་གླེང་མང་པོ་མཛད་པས་མོས་ཏེ། ཕར་ལ་ཡང་ཕྱག་རྒྱ་ཆེན་པོ་ག་འུ་མ་སོགས་ཕུལ། ཚུར་ཡང་སེམས་ཁྲིད་སྐོར་རྣམས་གནང་ནས་ཁོང་གི་རྨང་ལམ་དུ་ཡང་བུད་མེད་ཅིག་གིས་བསྐུལ་ནས་བྱོན་པ་ཡིན། ཆོས་བདག་པོ་ལ་འཕྲོད། ངའི་སྐྱེ་བའང་དོན་ཅན་དུ་སོང་གསུང་ནས་དགྱེས་པར་མཛད། རིན་པོ་ཆེ་ཆོས་དབྱིངས་པ་ལའང་སྣང་སྲིད་ཐམས་ཅད་བྲེ་ཁ་བཅད་པ་བཞིན་ཆོས་ཉིད་མཉམ་པ་ཉིད་དབྱིངས་རིག་འདུ་འབྲལ་མེད་པའི་ངང་ནས། འཁོར་འདས་རྒྱུ་འབྲས་ཐམས་ཅད་ཀྱི་མིག་ཕྱེད་འགག་ཁྲོལ། ཕུ་ཐག་ཆོད། རྨང་ཐོན། མཐིལ་ཁོགས་པ་འདི་ཁོང་གི་བཀའ་དྲིན་ཡིན་གསུང༌། འཁྲུལ་ཞིག་པའི་ཞལ་བརྡ་ལ་བརྟེན་ནས་ཡིག་ཆའང་མ་ལུས་པ་མཛད། སྤྱིར་བླ་མ་བརྒྱ་རྩ་བརྒྱད་བསྟེན། རྒྱལ་སྲས་དྲི་མེད་པའི་སྤྱན་སྔར་ཡང་ཆོས་ཞུས།